المساعد الشخصي الرقمي

مشاهدة النسخة كاملة : الساخر الشاعر.. على سلامة


high hopes
03-07-2007, 05:11 PM
على سلامة..
بالطبع يعرفونه من يقرأون الدستور..
ويعرفونه من يتابعون أغانى وجيه عزيز.. لأنه كتب له الكثير من الأغانى..
ويعرفونه من شاهدوا برنامج العاشرة مساء منذ فترة عندما إستضافته منى الشاذلى..
ويعرفونه من يذهبون كثيرا إلى ساقية الصاوى.. فهو يُلقى أشعاره هناك..
وأرى أن خير تعريف له.. هو قراءة أشعاره العامّية الجميلة.. الساخرة.. والتى كثير منها سياسى
مُعارض..
من أجمل ماقرأت له.. ناقص حتة.


ناقص حتة



وكل ما أوزن
ألاقي لسه
ناقصلي حته
أحط حته
تقل حته
وأجيب قميص
تضيع چاكته
وأعيش لي ساعة
يفوتني سته
وكل ما أوزن
ألاقي ناقص
أقول بناقص
لو هي حته
أتاري لسه
ولسه تاخد
سنين وحته
وحاجات تسيبني
وحاجات تاخدني
لحاجات تخبط
في كل حته
وأقول ها نفرح
ف يوم
ها نفرح
ويوم مانفرح
علي الله يفضل
في القلب حته


وأيضا..




مش أنا امبارح
رحت من بيتنا في السيدة
للشغل في حلون
في سبع دقايق
لا شوفت حد زعلان
ولا حد متضايق
والورد إنسان
والنخل متعايق
والناس جميلة مؤدبة
والجو رايق
والدنيا ماشية لوحدها
ولا حد سايق
ومش انا
امبارح برضه
رجعت من الشغل في حلوان
لبيتنا في السيدة
في خمس دقايق
لا حاسس بغربة
ولا شايف غريب
وقلبي ابيض حليب
عندليب
كروان فرحان
شايل ف قلبي وف جيوبي
الفرح أشكال وألوان
وزعت ع الشوارع
والبيوت والجيران
وطلعت البيت
ضربت الجرس
فتحت مراتي وبالأحضان
والعيال كمان فرحانين
ناجحين وجايبين
الدرجات النهائية
من غير دروس خصوصية
قمنا رقصنا وغنينا
واحتفلنا واتغدينا
فضلة خيرك
سمك واستاكوزا
وجمبري م الكبير
وحلينا ب مهلبية
وشربنا الشاي كمان
وفجأة
لقيتني بردان بردان
بصيت لقيت
الشباك مفتوح
ومفيش بطانية
ومراتي جنبي وزي ما هيه
لسة بتعاني من آلام المفاصل
وده اللي حاصل
والحمد لله
على كل شيء


ايضا لدى العديد من الفيديوهات المصورة له وهو يُلقى شعره فى ساقية الصاوى..
أحببت أن أفتتح المجموعة ب.. جتك القرف (http://rapidshare.com/files/40773831/_________.avi)..
طبعا هذا هو اسم القصيدة..:D ماليش دعوى..

وبالنسبة لكلماتها.. فهاهى:


جاتك القرف

على حد علمي ..احنا واسرائيل حبايب..
فيه سلام ومفيش حرب ...
طب الظباط والعساكر دول بيعملوا ايه في ميدان طلعت حرب ...!!
ده بنت وولد نازلين يشوفوا بلوزة تليق على ايشارب ..!!
بيحلموا وبيغنوا ..اجمل ما في غناهم انه طالع من القلب ..
من امتى العشق كان بيموت من الخوف ..
ومن امتى الحلم كان بيخاف من الضرب ..
يا كابتن يا باشا خليك ابن بلد ..
هوه انت معندكشي اخوات .. صبيان ولا بنات ؟؟!!
يعني انتو كل عليتكو ظباط ..يعني انتم أصحاب اكاديمية الشرطة ؟؟!!
واصحاب الشوارع.. والميادين و المحلات ..واصحاب البلد ؟؟!!
طيب .. طب انا هاخرم من التحرير لدار القضاء العالي ..
هاكل كشري واخش السيما .. مالك بقى ومالي ..؟؟!!
معايا بطاقة وخلصت الجيش .. بتسمي ده اكل عيش ؟؟!
يبقى عرفتك ..
طب عريني .. فتشني .. قطعلي هدومي وافحصني وخلصني ..!!
لا انت اول ولا اخر واحد ...
عارف ..؟؟
انا مرة القطر عدى وداسني وما موتش ...!!!!
عشق الحياة مهوش ترف ..!!
عرفت ايه معنى الشرف ..؟؟!!
جتك القرف..!!
جتك القرف..!!


لو عودة بإذن الله مع المزيد من شعر على سلامة.. الساخر .. الحزين.. الرائع....

مواطن مصري
03-07-2007, 08:55 PM
عرفته للمرة الأولى من أشعاره المنشورة يوميا فى جريدة الدستور، ثم عرفته أكثر وأعجبت به كثيراً بعد لقائه مع منى الشاذلى فى العاشرة مساء، ثم بالبحث على you tube حبيبى وجدت بعض أشعاره التى يلقيها بنفسه .. رااااااااائع ..



من قصائده المفضلة عندى:

منتهى البراءة



بمنتهى البراءة
سألتنى الصغنتوته نور
فى أربع خمس أمور
مش فى كتاب القراءة
قالتلى بابا يا بابا
مش انت يا بابا
بتكتب أغانى
وتقول أشعار
انا سمعت الشيخ يا بابا
بيقول انك يا بابا
هتروح النار
زى الناس الوحشين
الحراميين الكفار!

قوللى يا بابا
يعنى ايه استعمار؟
يعنى ايه نيل؟
يعنى ايه هرم؟
ومين اللى حط النسر ده
فوق العلم؟

يعنى ايه يا بابا استفتاء؟
ويعنى ايه انتخاب؟
ويعنى ايه حر؟
ويعنى ايه نصاب؟
وايه هو الاغتصاب؟
ويعنى ايه اختلاس؟
ويعنى ايه هجاص؟
ويعنى ايه خصخصة؟
وايه هو الدستور؟
يعنى ايه معارضه؟
ويعنى ايه مظاهرة؟
وليه النهارده
خدنا اجازة من المدرسة؟

قوللى يا بابا
يعنى ايه قهر؟
وفين بيقع خط الفقر؟
ويعنى ايه حظ؟
ويعنى ايه زهر؟
يعنى ايه يا باباحريه؟
يعنى ايه انسان؟
وايه هو السرطان؟

يعنى ايه يا بابا
خربوها
ومين دول يا بابا
ولاد القطقوطه
ومين دى
سماره يابابا
وازاى يا بابا
ضاعت من قلبك
وكنت فين لما خربوها
يا بابا
بابا
انت معايا
فيه يا بابا ناس
بتقول كفايه
وفيه عساكر
ماسكين عصايه
وبنات متعورين
وتانيين ماشيين بيضحكوا
يابابا .. هما دول اسرائيليين؟
قولتلها
نور
ممكن اسألك سؤال؟
قالتلى
اتفضل يا بابا
قلتلها
هيه قناة سبيس تون
رقمها كام؟
واخدتها......علشان تنام



ميدان الجيزة



ضيعت شوية سنين كدة
بحب من بعيد لبعيد
والحكاية مقضيانى
ومبسوط وراضى وسعيد
أفرح بأى حاجة
واستنى هدوم العيد
وبعدين ضيعت شوية سنين
نفسى أبقى أشطر واحد فى الكيميا
مع أنى مش فاهم ميدان الجيزة
والحياة رغم قسوتها
شايفها لذيذة

وضيعت شوية سنين بقى
نفسى أعدى اختبارات الكورة
فى النادى الأهلى
واشتغل فى وكالة ناسا
وابقى واحد من العلماء المهمين

وبعدين ضيعت شوية سنين
منتهى أملى كرسى فاضى
فى أُتُوبيس تلات خمسات
عين الصيرة أم المصريين

وضيعت شوية سنين
عايز أفهم الفرق
بين النكسة والهزيمة
والاحترام وقلة القيمة
وأبقى نجم سيما
م المشهورين

وبعدين ضيعت شوية سنين
واقف عند نظرية المؤامرة
لا عارف اعيش ف الزمالك
ولا راضى أعيش فى غمرة
ومش عارف لية الحشيش ممنوع
مدام مصرحين بالخمرة
وياترى بقى أتجوز
واحدة بيضة ولا سمرة
ولا اسأل فيها
رجال الفتوى والدين

وضيعت شوية سنين
مركز ف السيراميك
والبيبان والشبابيك
وألوان الحيطان
وده بيج وده سن فيل
والموضة الأصفر
وقشر الموزة

وضيعت شوية سنين
لا أنا بحر ولا نيل
حاجة كدة بعيد عنك
ملهاش عُوزة
ولما بقيت كام وخمسين
لقيتنى لسه
بحب من بعيد لبعيد
وبرضه مش فاهم ....
ميدان الجيزة




مصر والكاميرون

بقول لهم
مين اللي بيعيط بحرقة ده؟
قالوا لى
مواطن اتصور وهو بينضرب
قلت لهم
ومين الأمور اللى بيضحك ده؟
قالوا لى
دة واحد عمل شوية كوارث وهرب
قلت لهم
والدنيا عتمة هناك كده ليه؟
قالوا لى
دي حتة جديدة بتتخرب
قلت لهم
ومين الحاوى اللى بيتكلم ده؟
قالوا لي ده الوضع بيتقلب
وإيه الهيصة اللى في الساحل الشمالى دى؟
قالوا لى
دي البقرة بتتحلب
قلت لهم وانتوا قلقانين كده ليه؟
قالوا لي أصل بنلاعب الكاميرون
وخايفين نتغلب!




رابط له وهو يلقى (منتهى البراءة) :

http://www.youtube.com/watch?v=r_3Tz2uVymc&mode=related&search=


رابط له وهو يلقى (جاتك القرف) التى وضعتها سارة بالأعلى:

http://www.youtube.com/watch?v=fTxNXkXjcr8&mode=user&search=

أحمد يحيى
04-07-2007, 12:36 PM
أعرفه طبعًا عن طريق صفحات الدستور ..

رائع جدًا وأحرص على قراءته يوميًا ( في حالة شرائي الجريدة يوميًا أصلًا ) !!

أعجبتني جدًا " ناقص حته " ..

استمروا في وضع المزيد من أشعاره ..


شكرًا جدًا يا سارة و يا Egyptian Citizen ..:D

high hopes
04-07-2007, 01:13 PM
ايجبشن :)
جيد جدا.. كنت أود القول أن الموضوع مفتوح للجميع ليضع فيه ما لديه لكل ما يخص الشاعر
على سلامة.. لأن حقيقة ماهو موجود على الانترنت قليل..:rolleyes:
ولكننى ساستمر فى البحث.. وهذا لا يمنع أننى أحسد.. وأحقد..:mad: على متابعى الدستور اليومى لأنه يكتب فيه كل يوم.. أما أنا فأكتفى بقصيدة يوم الأربعاء :rolleyes:
شكرا.. ايجبشن.. أنا أيضا أحب مصر والكاميرون.. يصف الشعب المصرى بعينه :D
ومنتهى البراءة.. سكر..:D

أحمودى..
فعلا.. هو رائع جدا... مصرى جدا.. عربى جدا..;)
شكرا لتعليقك.. وبإذن الله أحاول أن أضع كل مايخصه هاهنا..

بالمناسبة.. قصيدته اليوم فى الدستور.. تُحفة بجد..:D
سأكتبها وأنشرها ها هنا.. ولكن..بعد قليل..

سأضع لكم قصيدة أخرى.. فريدة جدا..

الشعر عيرة والكحل عيرة
والورد فوق الخد
ولحد الضفيرة عيرة
الصبر عيرة والضحك عيرة
والفرح والأحزان كمان وحاجات كتيرة
حتى الحنان جوه البيوت
حتى الكلام...حتي السكوت
حتى الهتاف جوه المسيرة برضه عيرة
حيرني حيرة
بقينا ليه حبة حاجات
قمصان بدل على بالونات
ما بقيتش شايف إيه اللي جاي وإيه اللي فات
ما بقيتش افرق
ده أزرق ده ولا أحمر رمادي
ودي كارثة ولا ده وضع عادي
وده طفل ولا راجل عجوز
وده إيه ده راخر
جايز يجوز
نعسان ده ولا ساكت وساير
بردان ده ولا ده دور وداير
وده إحنا ولا الكل حاير




وأخرى.. بإسم.. قلم.. صادمة.. وحقيقية.. :)


أقولك حكاية...
يمِكن مَتصدقهاش...
النور قاطع ف شارعنا...
من سنين ولسّه مجاش...
عارف ليه...
آه والعيش والملح...
زى ما بقولك كده...
ودوَّرنا كتير مخلَّيناش...
وملقيناش...
غير سلك عريان مكشوف...
واقف ف العتمة مكسوف...
ساكت آه...
لكنَّه مبينساش...
لمَّا الماسورة اتخرمت...
وربطناها بحتة قماش...
ولكل جرح بينزف...
شوية بن...
ولو البن غالى بلاش...
إيه ياعم...
إحنا كل ده ف ميدان التحرير...
لسَّه متحركناش....
آه والعيش والملح...

أحمد يحيى
04-07-2007, 01:39 PM
سارة ..

لم أشتر الدستور اليوم ..:mad:

كفاية حقد بقا ..



قصيدة أمس كانت جيدة .. اسمها " مش واخد بالي "

يقول فيها :

النهارده معرفش مالي ..

فجأة اكتشفت ..

إني مش واخد بالي ..

سنين بتجرف سنين ..

حلوة العيال ف البيت ..

بس العيال عايزين ..

كان نفسي ..

أحوّش شوية صحاب طيبين ..

معرفش ليه كل شيء بيقل ..

و الواحد بقى بسرعة بيزهق و يمل ..

سيبت الشغل قبل المعاد ..

رحت عملت خمس شهادات ميلاد ..

م الجداد ليا و للولية و للولاد ..

عشان الرقو القومي ..

اتخبَطّ في عمتي ..

حكينا و رغينا ..

و قريت الفاتحة لأبويا و أمي ..

و بالمرة حلقت ..

حلوة الحلاقة ..

حاسس كإني كنت ف خناقة ..

و انضربت بجد ..

عارفة ..

نفسي أحضن حد ..

هيا الدنيا برد ؟؟

ولا أنا اللي مش واخد بالي !!



يللا بقا مستني قصيدة اليوم !!:mad::mad:

high hopes
04-07-2007, 02:04 PM
أحمودى.. شكرا عالقصيدة..
أكثر من جيدة..:)
هاهى قصيدة اليوم..


على باب السفارة


على باب سفارة كندا
لمحت ابليس وف ايده استمارة
بقوله على فين
قاللى بص
ياهجرة يا اعارة
يا عم زهقت.. كفرت..
الاقيش معاك سيجارة
انا انتهيت خلاص
لا نافع وسواس ولا خناس
ولا ليا عيش وسط الناس
دى عالم مجرمين
عندكوا فائض فى الفساد فى كل البلاد
ومش محتاجين شياطين
مليش عيش فى البلد دى
بقالى سنين عاطل
وانتوا بتعرفوا
تقلبوا الحق باطل
وتسلّكوا القاتل
وتمشوا فى جنازة المقتول
ومفيش مشاكل
ياعم ده انا بقيت اوسوس بالمقلوب
واقول للحرامى كفاية بقى
توب
انت هتعمل كل الذنوب لوحدك
وانا ابليس
واشتغل وأعظ
ولا كمسارى فى اوتوبيس
ياعم ده انا زمان
كنت استنى حد ينسى يسمى
وهو بياكل لقمته
دلوقتى كل اكلكوا ملوث
وبصراحة الواحد خايف
على صحته
ده مفيش ضمير اساسا
عشان اموته
وكل واحد بمزاجه
خربانة ذمته
ياعم ده كل حاجه اتسرقت
وكده الاجيال الجديدة
مالحرامية اتظلمت
ياراجل ده من كتر ما لطشت معايا
خرجت فى مظاهرة
مع الناس اللى بتقول كفاية
وبرضه مفيش فايدة


أراها.. فظيعة :D


لدى أكثر من فيديو.. جارى رفعهم ولكن.. هناك بعض المشاكل الصغيرة بينى وبين مواقع الرفع :madmido:
أزمة بسيطة جدا.. ساحاول حلها ::makhnook

أحمد يحيى
04-07-2007, 02:25 PM
. أراها.. فظيعة :D

فظيعة ؟؟ دي مريعة .. جبارة .. ملهاش حل على الإطلاق ..

جامدة جدًا يا سارة ..

شكرً جدًا !!

high hopes
04-07-2007, 03:18 PM
فظيعة ؟؟ دي مريعة .. جبارة .. ملهاش حل على الإطلاق ..

جامدة جدًا يا سارة ..

شكرً جدًا !!

:) .. العفو..

المزيد من القصائد...



قول كمان



معاك ومعايا
مش فارقة
لا الشعر أصفر
ولا حتي
العيون زرقة
وبنهاتي
وبنطاطي
ولا لسانه عارف ينطق خواجاتي
وإحباطك .. وإحباطي
مدام جينا
وعلي كتفنا تلال الهم والأحزان
نقول كمان
يا طالع الشجرة
هاتلي
معاك إنسان
هاتلي معاك
إسم
تاريخ ميلاد
عنوان
هاتلي معاك
وطن حر
ومواطن مش جبان
وبعدين نبقي ندور
ع اللي ضايع



ِبيوُتنا...


بِيُوتنا واسْعَةْ وِضقْةْ...
عصَافير كِتير...
ولا يُوم صَحيت م الزَقْزقَةْ...
بحلَمْ بعِيشَةَ محنْدقةْ...
وسْط البَرَاح...
لو كان صَحيح...
الحُزن رَاح...
طَب ليه الجراَحْ...
لسّه فَ عيونَا مخَنْدقَهْ...
بيَوتْنا أسَْمنَت...
وزَلط وِحِيطَانْ....
وبَس...زِى الآسِى....
متَرصَّصة..
مِرصُوصَة رَصْ...
دَار النَهار...
من داَرلدارْ...
طَبل وزَمر...
قال ْ وسار...
ولا حد حَسْ...




حَظّك اليوم...



تيجى نحسبها نلاقيها...
إحنا فيها...
لفّ واتفرج معايا...
ع اللى نايم...
واللى صاحى...
واللى طافى النور وصاحى...
واللى بتسليه جراحى...
واللى قال فات الكتير...
واللى طاير...
بس مكسور الضمير...
ع اللى مشغول بالدولار...
واللى ضيّع نص عمره...
فى كام بهيمة وكام حمار...
واللى قال الأرض باقية
واللى طُور مربوط فى ساقية...
واللى لسه قميُصه ناقص زُرار...
وفى ثوانى...
مات كيلانى...
كل واحد فينا قام يحسبها تانى...
اللى نايم واللى صاحى...
واللى بيفكر ينام...
كله قام...
أد إيه ف العمر باقى...
يسوى كام...
أما شاعر بايخ...
جىّ ليه تشعللها نار..
يلّلا نهرب من قساوة الجَدَّ...
ونضيع ف الهزار...
ف العصير والفطير...
واللى لسه قميصُه...
ناقص فيه زُرار...



وأخيرا.. مؤقتا طبعا.. كيس البرتقال.. جميلة..:)


كيس البرتقال ..



ملقيتش في الشتا ونيس
غير كيس البرتقان
اخد منه و اقشر
و اضحك احسن ما كشر
و اكدب علي روحي و افشر
وصدق اني بقدر
افرح زي زمان
ولما خلص البرتقان
و راح من المكان الونس
قربت من التليفون
جايز يرن الجرس
لقيتني انا و روحي مش مرتاحين من بعض
قلت مش مشكلة
المرة الجاية بقي
اعمل حسابي في قفص
مليان برتقان

مواطن مصري
05-07-2007, 11:02 AM
فظيعة ؟؟ دي مريعة .. جبارة .. ملهاش حل على الإطلاق ..


جامدة جدًا يا سارة ..

شكرً جدًا !!
نفس الكلام :)



والمزيد:



خايف أصحى ملاقيش مصر

خايف أقلق بالليل كدة
زى ما بأقلق
قبل الفجر
أو على وش الصبح
أنا وظروفى بقى
بعد العصر
وافتح الشباك وأبص مالاقيش مصر
اعوذ بالله من الشيطان الرجيم يا أخى
فال الله ولا فالك
طب وانت مالك
يعنى بيتنا اللى بيطل على النيل ده
هيطل على فراغ؟
دانتا دماغ
ويبقى بلدنا اسمها التجمع الخامس
والمجاوره خمستاشر ؟
مش هينفع

خايف أبص من الشباك مالاقيش مصر
ألاقيها لمت هدومها ومشيت
قرفت
زهقت
تعبت
لمت هدومها
وخدت هرمها على نيلها
وطفشت
وحلفت ميت يمين ماهى قاعدالنا
مابينى وبينك
برضه احنا زودناها
كاننها استعمرنا
ورثناها
هى دى البنت الأمورة
اللى كانت زى القمر
فجأة كبرت
عجزت
وبان عليها الكبر
خايف أبص من الشباك فجأه ومالاقيش مصر





حالة كِدة
معرفش ليه ..
تَنحت للدنيا كده ..!
فجأة لقيتنى مسكون بالملل ..
لا عندي رغبة ف البكا ..
ولا فى الكلام ..
ولا عايز أنام ..
ولا حتى بسأل إيه ده ليه؟
و أخرتها إيه؟
و إيه العمل؟
و أخاف أقول لأى حد ..
لحسن يقوم يقلبها جد ..
حد صاحبي ينزعج ..
يمد إيده جوه قلبه من باب الكرم ..
عشان يشاركنى الألم ..
أو يستلفلي من لئيم حبة أمل ..
حالة كده ..
معرفش إيه؟
ملهاش معاد
ساعات تزورنى فى الربيع ..
فى الحر ..
و ف عز الشتا ..
و تجيب حاجات ..
لا فيها روح ولا ميتة ..
حالة كدة ..
لامعاها تنفع كلمتين ولا غنوتين ..
ولا لقطة فى ألبوم صور ..
إلاقى قلبى ف الهوا ويا الكور ..
أخاف أقول لأى حد ..
أحسن يقوم يقلبها جد ..
حالة كدة ..
معرفش إيه ..
لكني بطلع منها بعد السكات ..
فاهم شوية ف اللى فات ..
حاسس أوي بحضن الصحاب ..
محظوظ أنا ..
ساعات أشاور ..
ينفتحلي ألف باب ..
لكنى بغلط فى الحساب ..
ومعرفش ليه ..
تنحت للدنيا كدة ..




قليلة الأدب


خد وادى معايا
وقولى كلام غير أى كلام
ولا الدنيا خلاص
والناس بطلوا حب واحلام
طب أقولك
أحكيلى حدوتة لحد ما أنام
والعبلى فى شعرى
بقاله سنين مشدود ع البكر
فى بطاقتى الشخصية
مثبوت أن أنا أنثى ..
وأنك دكر!
الميه الرايقه ساكتة سنين
وملاها العكر
كان صيف
وشتا
وخريف ومطر
جرب تعزف
يمكن لسه جوايا حاجات
دور جوايا تلاقى حاجات وحاجات
ضحك لفوانيس
وعروسة وعريس
ودلع ومياصة ولُقم بنات
محتاجه لحزن وفرح
ودمع ساعات
جرب تعزف
يمكن لسه جوايا نغم
وعجب ودهب
وسامحنى إن كنت صريحة معاك ..
الفجر وجب
شايفاك فى عيونك نار وغضب
سامعاك بتقول
ودى مين رباها ..
بنت الكلب قليلة الأدب!!



أحب العسل

أحب العسل
واموت فى الكسل
ووقت الأزمة
اقول فى العشق حكمة ومثل
وبس خلاص!
أهجص ..
الاقى ميت مليون هجاص
أفكر ..
هس ..
لاصوت ولا ناس!
لأنى كدة ..
ثقافة وعلم
يا دوب فى الفيلم ..
فى الكراس
وراسى زى أكبر راس
مفيش أحلام
مفيش إحساس ..




الفاتحة على الأموات

وفضلت أستنى أستنى..
لَحدّ ما عدى آخر قطر وفَات..
حَزنت قَعّدت أعيط أعيط..
تعبت م العياط..
قلت أتمشى أتسلى..
أتفرج ع الشوارع والناس والعربيات..
زهقت..
قُلت أرتاح..
سنَدت على روُحى..
إتلخبَطت جُوايا كل الحَاجَات..
مدّيت إيدى ف جيوُبُى..
لقيت شوية ورق قديم..
وصور وكروت تليفونات..
قلت أكلم مراتى..
افتكرت إنها خدت الدوا..
ونامت من تلات ساعات..
قُلت أكلم أخويا..
افتكرت إنه طلعِ مَعَاش مبكر..
وكَاره تاريخُه..
ومركّز ف التّأمينات..
أكلم أختى..
هتعيد وتقول نفس الحكايات..
أكلم خَالى..
افتكرت إنه غتت غَتَاتَة..
ومعايا أنا بالذات..
أكلم خالتى..
قُلت يا واد..
دى كانت خالتى وخالتك..
واتفرقت الخالات ..
أكلم صاحبى صلاح..
افتكرت إنه سافر العراق..
وفى إحتمال يكون مات..
قُلت أنا أعمل دماغ..
بس معرفش حد بتاع مُخدَّرات..
قُلت أمشى ف مظَاهرة..
لقيت العساكر راجعين..
مشطبين علَى كل الُمظاهرات..
قُلت اتصل بالسّادة المسئُولين..
هايتهمونى بإزعاج السلطات..
قُلت يارب..
هُو أنا إيه؟
وليه؟
ونسيت إيه؟
وقطر إيه اللى فات؟
الله يرحمك بقى يابا.....
والفاتحة على كل الأموات..









بعض الفيديوهات للقصائد التى وُضعت هنا ..



حالة (مع وجيه عزيز)
http://www.youtube.com/watch?v=u-NxEobE9Y8&feature=PlayList&p=0F3DCDBB6965B65E&index=20 (http://www.youtube.com/watch?v=u-NxEobE9Y8&feature=PlayList&p=0F3DCDBB6965B65E&index=20)



قليلة الأدب
http://www.youtube.com/watch?v=uSAnINTKR0U&feature=PlayList&p=0F3DCDBB6965B65E&index=11 (http://www.youtube.com/watch?v=uSAnINTKR0U&feature=PlayList&p=0F3DCDBB6965B65E&index=11)


كيس البرتقال
http://www.youtube.com/watch?v=WzbzO7q6J1w&feature=PlayList&p=0F3DCDBB6965B65E&index=1 (http://www.youtube.com/watch?v=WzbzO7q6J1w&feature=PlayList&p=0F3DCDBB6965B65E&index=1)


أحب العسل & الفاتحة على الاموات

http://www.youtube.com/watch?v=VXHsm37ltPg&feature=PlayList&p=0F3DCDBB6965B65E&index=15 (http://www.youtube.com/watch?v=VXHsm37ltPg&feature=PlayList&p=0F3DCDBB6965B65E&index=15)


خايف أصحى ملاقيش مصر
http://www.youtube.com/watch?v=qv8gXDfpgsc&feature=PlayList&p=0F3DCDBB6965B65E&index=14 (http://www.youtube.com/watch?v=qv8gXDfpgsc&feature=PlayList&p=0F3DCDBB6965B65E&index=14)

أحمد يحيى
05-07-2007, 11:43 AM
الله ينور ياإيجيبتشان سيتيزن ..:D


" خايف أصحى ملاقيش مصر " ..

جميلة جدًا .. الجمال في الفكرة ذات نفسها ..

وافتح الشباك وأبص مالاقيش مصر
يعنى بيتنا اللى بيطل على النيل ده
هيطل على فراغ؟
و التعبير بـ ( هيطل على فراغ ) رائع بجد !!

برضو " قليلة الأدب " جميلة جدًا ..

مش عارف نفسي ألاقي قصيدة وحشة لعلي سلامة :D

خدوا دي اسمها " لوحة مزركشة "




أنا عندي هشهشة ..

و مشاكل ف العظام ..

و لوحة مزركشة ..

معرفش تساوي كام ..

و عندي شقة بحري ..

و ترى الأهرام ..

الشمس تخُشّها ..

يادوب قبل الضلام ..

ما أنا عندي ..

آمال عريضة ..

و فرحة لكن بعيدة ..

جوايا حاجات بتضحك ..

لكن مش سعيدة ..

و عندي شهادة عالية ..

و بلاوي كتير بليدة ..

بالليل قبل ما أرُوح ..

آخد في إيدي جريدة ..

ألاقي الدنيا لسه ..

بتقول نفس الكلام ..

high hopes
05-07-2007, 05:25 PM
ماشاء الله.. :)
والله برافو عليكوا..
ايجبشن بس انا متغاظه عشان كل اللى حطيته ده عندى وكنت عايزة احطه..:(
بجد شكرا جدا.. ليك انت واحمودى.. :)


قصيدة مش عارفة اسمها...:rolleyes:


الواد ابنى ابو لسان طويل
قالى
يعنى سافرت يا بابا واتغربت
مشوار طويل
وف الاخر راجع..
ف شارع متفرع من شارع
وشقه فى الدور الرابع..
ودولار نزل طالع...
وشويا حاجات..
دكان مستنى التراخيص..
ومكنسه على خلاط
وكمبيوتر مش نافع...
من الاخر معرفتش تتصرف..
مقدرتش تقول
لاء
مش مسافر...
.....
منين الكحه دى يا بابا...
دى عمر..!!
ولابرد...
ولا سجاير..!
.....
انت عارف يا بابا انا بقالى اد ايه بستناك؟؟

ايه يا بابا
انت هاتعيط ....
ده انا كنت بهزر معاك...
كنت بهزر معاك...




لو موصوفلك


لو موصوفلك ترجع.....جوة الهيصة
وعيش
لو موصوفلك ترجع....روح ويارايت
متجيش
لو موصوفلك تضحك......اضحك
على أحزانك
لو موصوفلك تعشق...حب واقف فى
مكانك
لو تختار فى زمانك........أحسن
ماتنقيش
لو موصوفلك تحلم....قضى الليل
بردان
واعمل روحك ترتاح....ناسى انك
انسان
لو موصوفلك ترتاح....نادى وقول
يا جراح
ما يغركش براح ساكت ما بيبكيش......
ساكت ما بيبكيش !




الْكيِلُوْ تسعينْ




يكُونْ ف عِلْمَكْ...
أنا مُتواضَعْ جِداً....
وِمشْ طالبْ كتيرْ....
يَعنى شَقَة صُغيِرةْ...
ف الكيِِِِِِِِِِِِِِِلُو تِسعينْ...
مَا هى الحَياة مَشَاوِيرْ....
مِشِ شرْط بَقى بتطلْ...
عَلَى جَناين وهَوا وعَصافيرْ...
وبنت حَلالْ ومِش شَرطْ....
زَى اللى ف الكلَيب الأخيِر...
وحِتة مدرسةَ صُغيّرةَ...
أهَى أِلعيال تُفكْ الخَطْ....
ومِش شَرْط لُغات وحرَكاتْ...
وجَغرافيا وتعبيِرْ...
وأدْخلْ القسْم...
أطَلَعْ زِى ماَ دَخَلْتْ...
مُحتْرَم وكبيِرْ....




]

انا بصراحة ترددت فى نشر مين رباها.. خاصة عشان الجزء الأخير وقوانين روايات وكده.. :).. بس كويس انك حطتها..
فى قصيدة تانية.. لعلى سلامة.. معتقدش انى هحطها.. هى مش مبتذلة أبدا.. بس يعنى..بلاش احسن..

مواطن مصري
06-07-2007, 03:28 AM
بس انا متغاظه عشان كل اللى حطيته ده عندى وكنت عايزة احطه
خيرها فى غيرها ;)

فى قصيدة تانية.. لعلى سلامة.. معتقدش انى هحطها.. هى مش مبتذلة أبدا.. بس يعنى..بلاش احسن..
أوعى تكون (أحسن م القعدة على القهوة) اللى جاب فيها سيرة شيوخ الفتاوى اياها ..
أصلها عندى وكنت هحطها بس كدة اترددت شوية :rolleyes:







ومع المزيد والمزيد :



بوابة تفتيش

بَوّابْة تَفتيش على بَابَكْ..
كُل ما احَاولْ أعَدَّى تَزَمَّرْ..
وبْتْشَرَّطْ..
وَبتْتْأمَّرْ..
أرَجَع أدَوَّرْ تَانى وأدُوَر..
وكُل ما عَدَّي بَرْضُهْ تزمَّرْ..
طَب آدى السَّاعَةْ..
وآدى حَزَامى..
وآدى بطاقتى...
والنَضَّارَةْ..
وآدى عنوانى..
وكُل حَكَايَتي..
وآدى أَمَارة..
حَتَّى الفكَهَّ البَاقْيةْ ف جيبى..
والأشعار..
والَمْحفَظةْ مَفيْهَاشْ غِيرْ صُوْرتَكْ..
ليلْ ونْهَارْ...
كُلْ هَدُوْمي..
زَى مَّا نَازَلْ منْ بَطْن أمى..
من غيرْ حَتَّى وَرَقةْ تُوَتْ..
وكُل مَافُوتْ..
الَبوابَّةْ بَرَضَكْ بِتزَمَرْ..
ولما لَمَحنْى..
واحد طَيبْ م الُحراَس..
وقَاللي اسْمَعني يا ابْن الناس..
إرْمي الحتَّة الحلوةْ ف قلبكْ..
وعَدى..
والبَوابَة عُمْرهَا..
مَا تْزمَّرْ..





كنت فين يا على

كَأننا فِى حَالة حصارْ...
شَكلنا الصُبحْ...
زَى شَكُلنا آخر النهارْ...
والدُنيا بَرَدْ...
زَى الدُنيا حَرْ ناَر...
عِرفَتْ إيه معَنى اسْتِعمارْ...
مِن غيِر مَدْفَعْ ولا عَسَكَرى...
كُنَت فِينْ يا على..!


اشرب

عَرْفاكْ .. عَرْفاكْ...
هاتلف تلفْ...
وفِى الأخَر جاىْ...
سَمْعاكْ...
بتُقولِ ضُمينى...
سامْحِينى...
لأ يا رُوح أمُكْ...
مَبقَاشْ...
عَيَّانْ تَعَْبانْ مَديُونْ ومفلَسْ...
مَا أنا مدَيتْ إيدى للى يَسْوَى...
واللى ما يسْواش...
لاَ عَندى بُنْ...
ولا عِندى قُطنْ...
ولا عِندىْ شَاشْ...
ضَحكُوا عَليك...
وقالُولك خَللى السَلاح صاحىْ...
وهُم طول الليل والنهار نايْمين...
وانت طول عُمركْ...
بتبيعْ ببلاش...
اشرَب...




رقم

إِحْنا...
يَا دُوبْ رقمْ...
والمَتش شَغَّالْ...
من غير حكم...
فاولْ مفِيشْ...
آوتْ مفيش...
ومَفِيش ضَربة جَزاءْ...
وكل يومْ مُوضَة...
وكل دقيقَةْ عرَض أزْياءْ...
وكل شئ للبيعْ...
ومفِيشْ أكتر من الأسواق...
وإيهْ يعمل الأدبْ...
وإيه تَعمل الأخلاق...
فِى متشْ...
مِن غيرحَكَمْ...




المصرى

الْمَصْرىْ ع الْمَصْرىْ...
يقدَرْ ويتْشَّطرْ...
والِلى بَنى مَصْرْ...
لا خَطّطْ...
ولا سَطرَّ...
ولا قال فى يُومْ...
الَمَطره هاتمطرْ...
إلِلى...




زغزغنى

زَغْزَغْنِى...
يمكن أضَحَكْ...
يمكن أفْرَح...
يمكَن أطلَع...
مِ الَلى أنا فيهْ...
زَغْزغْنىِ...
يمْكن أحْلَم...
يمكن أغير...
يمْكَن أقَول اللى مخَبيهْ...
مِش جَايزْ...
لِسَّهْ الدُنيا جَميلَة بجَد...
ولسَّه النَاسْ...
فِى الصيفْ والبَرْدْ...
ولسة الورد...
مِشْ يمكنْ...
يطْلَعْ فيَّا العيب مش فيه...
زَغْزَغْنِى..!



سلطة

أحْلامْنا سَلَطَةْ...
وكَلامْنا سَلَطَةْ...
والحب عيبة....
والعشق وَرطَةْ...
غِلط غلْطَةْ...
كأَنى ماشى من غيرْ دماغى
كأْنى أقف أدَّن فَ مالَطةْ...
سَلَطَة...
وتَملى خَسْ وجَزَرْ...
ناديتُه لكن راح واعتذَرْ...
أَلاقيش مَعاك سنةْ أمل...
ألاقيش مَعاك حَبةْ نْظر...
اليُوم وفاتْ...
وبُكرَه فَاتْ...
مَفْضلِشْ غير...
حَبة سُكاتْ...
وتقُولِلى هاتْ...
أحَلامْنا ليهْ...
سَلَطَةْ...




مفيش حد

مَحَدَّشْ فينا قَامْ الصُبْحْ يتمطَّعْ...
وقالْ نِفسى أطْلعْ القَمَر...
ولا حَدْ فيِنْاَ بيْغيرْ...
منْ العَصَافيرْ الحُرةَّ ع الشَّجَرْ...
ولا حَدْ فِيناَ إنْدَهَشْ م السُؤالْ والخَبرْ...
عايِشينْ بَسْ كدهْ...
عَاَلة ع البَشَرْ...
هىَّ الَمراكِبْ للْهُرُوبْ ولاَّ السَّفَرْ...
لو عِشْنا نَسْتَنى المَطَرْ...
هَنْمُوتْ أَكيْدْ عَطشانينْ...
هوَ إحْنا مِينْ...




من بعيد

بَقيِتْ أخَافْ...
من طَبيب الأسْنانْ...
ومِن كُل الطُيور...
حتى الكَرَوانْ...
وم الشَّاى اللى ف الدكانْ...
وم السُكر...
وم الحَادقْ وم الحراَّق...
وم الحَلاقْ...
منْ العسكرى وم الأتوبيسْ...
ومِن إبليس...
من الشَّارع والرَّصيفْ والرََّغيفْ...
وأخويا الضعيف...
وقَطر السكَة الحَديدْ...
مِش هو القمح برضه...
زَمَان كان لُه عيد...
وكَان لهُ غنوةْ حلْوةْ...
وف كِتاَب الأناشيدْ...
بَحبكْ يا بَلَدْنا...
بَس من بعيد لبعيد...

مواطن مصري
06-07-2007, 03:48 AM
الأهلى وطنطا

يمين حاضِر...
شِمال حاضر...
عشان خاطر...
ما هُو السِواقَ جَدعْ شاطِر...
يسُوقْ دُوغْرى...
نروح دوغرى...
وعند نَزَلة الكوبْرى...
لقيْنا رُوْحَنا مِش فاهْمين...
مَفَيش ميهْ ولاَ بنْزينْ...
قلعنا الصبر والفَساَتينْ...
والدنْيا هيصَه والزَحمة وَرَطةْ...
ومَعَدْشْ ينفعْ تِتْصَلّحْ الغَلطَة...
وأنا كُلْ خوفى...
يفُوتنى مَتَش الأهْلى وطَنطَا...
فى كاس مَصَر...




حظك اليوم

حَظّك اليُومْ...
زَىّ إمْبارحْ...
زَىّ كُل يُومْ...
ومَفيشْ حَاجةَ متْغيّرةْ...
الْبت الطّويلَة عَايزَاكْ...
بَسَ إنت عَيَنكْ ع الْقُصيرةْ...
يَا لَئيمْ...
بَسّ إبن حَلاَل وطيّب...
وتِستاهل كُل خير...
وحِتّة سُكّرة...
شُوف...
الزَّهْرة مع الْمرّيخْ وعَطَاردْ...
وشْويّة كَوَاكب كَدهْ...
عامَلين معاك شُغل...
آخرْ مسْخَرَةْ...
تطْلَعْ منْ إنتخَاباتْ...
عَلَى استفْتَاءاتْ...
وَحَاجَاتْ ومحْتاجَات...
وبيعْ وسَمسَرةَْ...
وإنتَ ماَشَاء الله عليِك...
غَزَالْ يا رَبّى...
لاَ هَمّك إشاراتْ...
ولاَ مْطّباتْ...
ولا شَوَارعْ مِكسّرة...
شُوفْ...
التّعْليمْ...
زَىّ الْقَديم...
والصحّة رَبّنا يُسْتُر...
مَتتْخَضّش كدَه يَاعَمّ...
إيه يَعْنى الْلى جَرَا...
عَنَدكْ حَاجَاتْ...
وَحَاجَاتْ تَعْديِلْ...
وَحَاجَاتْ...
تتْغَيّر ف التّوْكْيل...
وَحَاجَاتْ مَعَدْتَش تِنْفَعْ خَالصْ...
وحَاجَاتْ عَايزَةْ...
بوَية وسَمكّرةْ...
شُوفْ...
مَعْمولّك عَمَلْ مَرْبُوطْ...
فِى ديل قرْد شَقِى وَمحْطُوطْ...
فَ حَاجة مدَوَّرْةْ...
وبَعْد نُقْطُتينْ...
راَيحْ حتّةْ...
اللهُ أْعَلَمْ فِينْ...
لا ليها عُنوَان منْ قُدّام...
ولا مِنْ وَرَا...



ختم دخول

مِش معْقُولْ...
بِيِنى وبِينكْ خِتْمْ دخِوُلْ...
ودول ظُباَطْ وعَسَاكَرْ...
ولا حَبَايب...
أنا مِش فَاكِرْ...
أنا مِش غايِبْ...
أنا مِش سَاَيبْ ولاَ فتْفُوتَةْ...
إيهْ اَلحدُوتَةْ...
لِسّهْ جَمارِكْ...
لِسّهْ هانُدُخلْ تانى معارِكْ...
ده أنا مِش مالِكْ...
غَيِرْ أشواقْ...
الَله يِلعَن أى فُراقْ...
بيْنِى وِبينكْ...
خِتمْ دُخوَلْ...
مِش معْقُولْ...



ورق عنب

قَالتْلى اخْتَلافْناَ...
قولتْلها مِن زْمَان...
قالتِلىِ...
يا رَاَجِل دِماَغَكْ ولا يهِمَكْ...
تتعشا...
قُلتلْها مِش جَعانْ...
قالتلى دِه مَحْشى...
قُلتِلها وَرَقْ عِنبْ...
قْالتِلىِ بِتِنْجانَْ...
قُْلتِلها إخْتلافنَا...
قالتلى منْ زمَااااااااااانْ






ساعات المطر

ساَعَاتْ الَمطَرْ..
وساَعَاتْ..
أوَقاتْ بييجى ضَعيفْ..
يا دوب كام نقطة..
تبل وش الرَصيفْ..
وتُنقش ع الإزاَزْ خَيالاتْ..
وساَعَاتْ يهز الأرضْ..
ياخُدْنا نُحضنْ بَعض..
نِفتَحْ شبابِيكْنا إزازْ وشيشْ..
تَقوليلى مَتخَفْشى..
وأَقولكْ مَتخَفْيش..
يا هَل تَرَى هَنْموتْ م البَرْدْ..
وَلا ابتَدينا نعيشْ..





البلكونة

تضيق الشقة...
نِقفل البلَكُونة ألوُميتال...
نزهق من بعض...
نِقول عَََََََََََََشان خاطر العيِال...
ولما تزهَق العِيال...
نِقول قِلة أدب...
مترَبوش...
وينقطع النُور...
عِندنا شَمع متخفُوش...
ونِعيش ناكل ونِشرَب...
ونِتعالج ونتألم ونِتعلم...
وكل ما تضيق الشَقة...
نِقفل بَلَكُونَة...
واِللى نِعرفهُ...
أَحسن م اللى مَنعِرفُوش...




على رأى الست

متَقلقش...
ومتخَفش...
كُله مِخطط ومرسوُم...
لو مَدفعتش الرسُوم...
هاتِدفَع الرسُوم...
وارمى بِقى دَوا الضغَط دهِ...
خَلاصِ مَلوش لزوم...
لا طَنطَا هاتاُخد الدورى...
ولا الِلى قاعِد علَى كرسِى...
هايزِهق ويقَوم...
وعلَى رأى السّت...
أُم كلُثوم...
كِفاَية بقَى...



العفريت

يُوم بَرد...
ويُوم حَر...
وبِعدين معَ الُجَو...
والقمر يكشر...
أقُول بُكره ها يحلو...
تاخُد امريكا أجازة...
يطَلَع العَفرِيت م الإِزَازَة...
ويقُول لنا عَو...
عارِف إنت طَيب...
طَيب بس لو....



غاز طبيعى

خطر الإزاز..
جوه الكراكيب..
بنصدر غاز..
ومفيش أنابيب..
ولية بنفتح كدة ببلاش..
ولية بنسيب..
وآدى اللى راح..
أهو راح ولا جاش..
ومنين أجيب..
مش معنى مرة تسجل جون ..
انك لعيب..
مكتوب على وشى اسمى مصرى..
مصر ليه تسمينى غريب..

high hopes
06-07-2007, 04:38 PM
.. شاكرة جدا لمجهودك ايجبشن.. :)
عرضت قصائد أقرأها للمرة الأولى.. ولم أجدها على النت.. من أين أحضرتها؟ :confused:
اشكرك فعلا.. أتمنى لو يصبح الموضوع موسوعة لكل قصائد وشعر على سلامة..
الفيديوهات التى بحوزتى وضعتها أنت .. :) .. وشاكرة لك لأننى كنت أعانى مع مواقع الرفع..
بالنسبة للقصيدة التى أعنيها.. لا .. ليست هى.. والقصيدة التى تحدثت عنها لم أقرأها..
ولى رجاء منك .. أبحث عن قصيدة له لا أعرف إسمها.. سمعتها منه فى برنامج العاشرة مساءا..
يُذكر فيها أن الراجل رجل والست ست.. وان رجل يقول لإمرأة أنه سيكون هو الرجل ولابد ان تطيعه وأشياء من هذا القبيل.. ثم يسألها فى نهاية القصيدة عن مرتبها.. فتقول له وانت مالك فيقول لها انا مش راجل انا عيل.. حاجه زى كده يعنى :D
المهم ان القصيدة هذه أعجبتنى للغاية.. وبحثت عنها بلا جدوى.. وكنت أنوى إستخدامها بشكل معين..:D .. إذا كنت تدرى عن الصراع الدائر فى أحد المواضيع بالمنتدى ستفهم ما أعنيه..:)
على كل حال.. شكرا لك كثيرا.. :)

أحمد يحيى
06-07-2007, 06:35 PM
يااااااااااه .. كل ده ؟؟

حاجات قريتها و حاجات مقريتهاش ..

بس كله جميل و الله !!:D

بس أنا ليّا طلب بليز ..

محدش يحط مجموعة كبيرة في الرد الواحد .. عشان كده أنا بتكروت و مش بعرف أستمتع بيهم كلهم !!

بيتهيألي كفايه اتنين تلاته، أو حتى أربعه ف الرد .. ولا رأيكم ايه ؟؟
:D

مواطن مصري
07-07-2007, 04:15 PM
محدش يحط مجموعة كبيرة في الرد الواحد .. عشان كده أنا بتكروت و مش بعرف أستمتع بيهم كلهم !!

بيتهيألي كفايه اتنين تلاته، أو حتى أربعه ف الرد !!
طيب لما أنا دلوقتى عندى تقريبا كل أعداد الدستور اليومى من ساعة ما ابتدا وعندى من قصايد على سلامة اللى محدش كتبها هنا حوالى خمسين واحدة وأنا مسافر إن شاء الله يوم الأربع عمرة وهقعد أسبوعين أنزلهم تلاتة أربعة فى المرة إزاى؟! :rolleyes:
هو طبعا الواحد معندوش مانع يزود عداد المشاركات شوية;) بس أنا عايز أنزل اللى عندى قبل السفر .. أقولك .. أنا أنزل العدد اللى يريحنى وانت أبقى اقراهم واحدة واحدة على مهلك محدش بيجرى وراك :)



أبحث عن قصيدة له لا أعرف إسمها.. سمعتها منه فى برنامج العاشرة مساءا..
يُذكر فيها أن الراجل رجل والست ست.. وان رجل يقول لإمرأة أنه سيكون هو الرجل ولابد ان تطيعه وأشياء من هذا القبيل.. ثم يسألها فى نهاية القصيدة عن مرتبها.. فتقول له وانت مالك فيقول لها انا مش راجل انا عيل.. حاجه زى كده يعنى
للأسف مسمعتهاش فى حلقة العاشرة مساء لإنها جت فى عز الامتحانات فمقدرتش أشوف الحلقة كلها .. دورت فى جبل جرانين الدستور اللى عندى وملقتش حاجة زى كدة .. ممكن النصيب إنها تكون فى الأعداد القليلة اللى مش عندى وممكن يكون منشرهاش أصلا فى الدستور :(
قصيدة مش عارفة اسمها...
اسمها (الواد ابنى) .. لقيتها منشورة فى دستور 28/5/2007 :D




ومع المزيد والمزيد:
معلش بقى يا أحمودى





هذه القصيدة بالذات علقت فى ذهنى منذ أن قرأتها للمرة الاولى منذ أكثر من شهر ولا عجب إن كانت هى بالذات التى اختارتها منى الشاذلى لتلقيها بنفسها قبل أن تقدم الشاعر على سلامة .. أسلوب تعبيره عن قابلية كل شىء فى هذا الزمن للبيع بثمن بخس مهما بدا غاليا ومهما بدا ذلك صعبا فى البداية أكثر من رائع ..



بيت أبويا

بُص يا عم..
تبيع الأراضى..
تبيع الشواطئ..
تبيع النوادى ..
تبيع المطار..
تبيع الغاز..
تبيع العيش
على الخباز..
تبيع الدرس والأستاذ..
تبيع الجاموسة..
تبيع الحمار..
كله إلا بيت أبويا
بتاع المِغربلين..
عشان خاطر عضم التُربة
ورحمة الميتين
دى مفيهاش هزار..
طب أقولك..
لما تبيع تودينى السيما
وتجيبلى آيس كريم شيكولاتة
وحاجة ساقعة كانز
وكيس فشار
ولو بتكدب عليا
ربنا يوديك النار
هِه بَس..




ودى كمان بحبها مووووووووووووووت:



حصة رسم

ولما نعشق بنغنى..
ولما نبكى ليه بنرتاح..
وليه الألم بيفكرنا..
إن إحنا لِسهْ بنى آدمين..
وساعات نعَدِى كدة ونْفُوت..
ونشوف حاجات جوانا بتموت..
ونكمل اليوم قال يعنى..
أصل اتلَخَمنا ومش شايفين..
إلا احنا كنا زمان أطفال..
فينا براءة وفينا حنين..
هو احنا رُوحنا بجد مدارس..
وخدنا فى العربى وف الدين..
وكان فيه حصة رسم كمان..
وكنا نحلم بالألوان..
وكنا نحضن بعض بجد..
اصحاب أوى وقريبين..
لو حد يعرف بس يقول..
هو احنا صح كدة على طول..
ولا احنا تُوهنا ومش عارفين..
هو الطريق ده رايح جاى..
ولا اللى راحوا..
مش راجعين..





ودى كمان بحبها قوى قوى:




أنا المواطن نقط نقط نقط

يكون ف عِلمَك..
أنا مش جبان..
ولا بتهان وأسكت زى زمان..
أنا بأصرُخ وأكتب وأبعت وأتكلم..
واسمع بقى يا معلم..
أنا المواطن نُقَط نُقَط نُقَط..
رقم قومى نُقَط نُقَط نُقَط..
محل الإقامة نُقَط نُقَط نُقَط بجوار البنزينة..
بصراحة حرام تعملوا فينا نُقَط ونُقَط ونُقَط ..
وتطلعوا نُقَط ونُقَط أهالينا..
عملتوا انتخابات وكلها نُقَط نُقَط نُقَط..
وشيلتوا وحطيتوا حاجات نُقَط ونُقَط ونُقَط..
بصراحة...
أنا بقيت قدام مراتى حاسس إنى مش نقط خالص..
وأقول لها نفسى أبقى نقط بجد..
تقوللى يا خويا متحرقشِ دمك..
حسك فى الدنيا..
بكرة تبقى نُقَط ونُقَط ونُقَط..!







دى كان مفروض أحطها قبل (منتهى البراءة) لإن فيها هو بيتكلم عن الحاجات اللى بنته نور سألته عنها (خربوها، سمارة، ولاد القطقوطة)



خَرَبُوها

خَرَبُوها..
الأوّلَة آه..
والتانية آه..
والتالتة مفيش..
معنديش..
معنديش نِفس أقول آه..
معنديش..
قالوا اقلعوا..
وقلعنا..
ومفيش بتاعكو..
وبتاعنا..
وصار متَعهم مَتعنا..
وألف مرة اتلسعنا..
وبرضك مفيش..
الأوّلَة آه..
والتانية آه..
والتالتة مفيش..
قالوا ابصموا..
بصَمْنَا..
ده بكره سكر وسمنة
سيبنا غيرنا رسمنا
اتقسمنا..
على أد ما فينا من جراح ابتسمنا..
الأوّلَة..
والتانية..
والتالتة مفيش..
الدنيا هاصت وهيصنا..
ريَّحنا لما تيِّسنا..
تاه الطريق من اتوبيسنا
يئسنا..
لا عرفنا ليه قلعنا..
ولا عرفنا إيه لبسنا..
الأوّلَة..
والتانية..
والتالتة مفيش..
وأهى ماشية تجرى المسائل..
ولا حد سائل..
يصحى مُرسى..
ينام وائل..
ده أنا كنت واد م الأوائل..
وكنت شاطر شطارة..
وكنت فن وعمارة..
وكنت صاحب تجارة..
معرفش إيه اللى صابنى..
فى قلبى ضاعت سمارة..
خربوها..
خربوها ولاد القطقوطة..
لا طرحت بامية ولا قوطة..
وسابوها فى سرير مربوطة..
وياريتهم طلعم رجالة..
ويا ريتها رايقة ومبسوطة..
خَرَبُوها..
دول سرقوا الهوا والضَّى..
ويا عينى عليها بَلد..
يا ريتها ما قالت أى..
ويا ريتها ما جابت ولد..
خَرَبُوها..
دول سرقوا النخلتين والنهر..
والمدرسة..
والهندسة والجبر..
سرقوا الشوارع والمعانى..
والأغانى..
وسيد درويش والريحانى..
سرقوا المشاعر والمَزَاهِر..
والبُخور..
سرقوا الحزن..
سرقوا حتى القبور..
خَرَبُوها..
دول سرقوا الطَّيب والزين..
وسرقوا الكحل من العين..
وسابوها تاكل بالدين..
وإن يوم اتعدلت
عوجوها..
خربوها..
خربوها..
خربوها ولاد القطقوطة..

مواطن مصري
07-07-2007, 04:17 PM
قرنبيط

بقول لَها إنتى فين..
قالتلى إنتَ جيت..
قولتلها مشيت
م الشغل بدرى..
قالتلى عَديت على أمى؟
قولتلها نسيت..
عاملة إيه ع الغدا؟
قالتلى قرنبيط..
قولتلها تصدقى..
بحسبه جمبرى..
قالتلى إنت بتستعبط؟!
قولتلها لأ..
عبيط...!




ثقافة

فيه ناس لما تِضايق..
تملا البانيو وشوية بخور
وشمع ومزيكا وأغانى..
أو تروح تِحْكى وتاخد وتِدىْ
مع طبيب نفسانى..
أو تطلع شرم الشيخ تانى..
ودى ثقافة..

وفيه ناس لما تتخنق..
ترجع تقلب ف اللى فات..
وتجيب الصور والذكريات..
وتاخد جوافة وبلح أمْهَاتْ..
وتروح تزور الميتين ف القَرَافة..
ودى ثقافة..

وناس تِلمْ العيال..
وربع لب ونص سودانى..
وفيلم قديم لإسماعيل ياسين..
أو نجيب الريحانى..
أو تعدى ع الحلاوانى..
وكيلو مشكل وتكَتَر الكنافة..
ودى برضُه ثقافة..

والكل مجروح..
ونفسه يبوح..
بس مش عارف..




معرفتش أحضُنَك

معرفتش أحضُنَكْ..
معرفش إيه حَشنِى..
بتوحشنى..
بجد بجد بتوحشنى..
معرفتش أحضُنَكْ..
يمكن عشان..
طعم الكلام..
يمكن عشان..
كتر الزحام..
مخنوق..
وهى الدنيا إمتَه..
كانت بترُوقْ..
يمكن عشان..
خايف أفُوق..
معرفتش أحضُنَكْ....




تَذكَرة

العمارة بتنهار..
ومفيش قرار تنكيس..
والمنجا فى التلاجة..
والصبر فى القراطيس..
وربنا ما يحوجنا..
للدم اللى ف الكيس..
صحيح مترو الأنفاق..
وصل رمسيس..
لكن لسة حقنا مكتوب..
على ضهر تذكرة أتوبيس..
هى التذكرة فين..
يا بت..




طلع الكلام ناشِف

كان نفسى أقول..
غنوتى ناعمة رومانسية..
طلع الكلام ناشف..
كاشف هموم فىَّ ....
لا القلب نفس القلب..
ولا الحياة..
هىَّ....



مِرَايَا

قلت أبص فى المرايا..
يمكن أكون إحلويت..
فضلت داير أبص..
مخلتش ولا مرايا فى البيت..
فى الحمام
فى الأودة
فى دولاب..
أو متعلقة على الحيط..
شُفت..
سكت شوية وبعدين اتخضيت..
معقول أنا قضيت العمر ده كله..
وزى ما رحت زى ما جيت..
معقول أنا عمرى ما فكرت ولا إتغيرت ولا حبيت..
وإزاى ساكت على روحى ده كله..
وليه استنيت..!
يا ريتنى ما كان عندى مرايا..
وياريتنى ما بصيت..



شارع عبدالعزيز

صديقى اليابانى..
كان فى زيارة لمصر تانى..
وهو شخص ابن بَلَد ولذيذ..
كان فرحان أوى واحنا بنتمشى
فى شارع عبد العزيز..
قاللى شايف يا فريكْيكُو..
كل ده يابانى .. كل ده يابانى..
وده اللى خلانى أقولُه
طول عمرك يا سِيكُوسِيكُو خايب
شوف انت تسهر وتفكر وتصَدَر
وأنا آخد جمارك وضرايب..
انت هنا فى بلاد العجايب..
أمال إيه..
قاللى ليه الهيصة الكتير دى واللمَه
قلت لُه البلد كلها ف ثانويه عامة..
عندكو مكتب تنسيق يا سيكو سيكو..
قاللى بس ده مش حل يا فريكْيكُو
عندنا فى اليابان مفيش مستحيل..
قلت له وعندنا ف مصر بالنا طَويل..
وعندنا تلات أهرامات ونيل..
ومستوره وزى الفل..
قاللى عندنا ف اليابان المسئول اللى يغلط..
مفيش غير الانتحار..
قلت له وعندنا ف مصر
اللى يخربها بيخرج منها
معزز مكرم
من صاله كبار الزوار..
ده المسامح كريم يا أخى..
وبعدين..
رُوحنا اتغدينا كوارع ف الحسين
ومن ساعتها مش عارف هُوَ فين..
مشفتش سيكوسيكو يا حج رِضَا..

high hopes
08-07-2007, 11:37 AM
ايجبشن..

طيب لما أنا دلوقتى عندى تقريبا كل أعداد الدستور اليومى من ساعة ما ابتدا وعندى من قصايد على سلامة اللى محدش كتبها هنا حوالى خمسين واحدة وأنا مسافر إن شاء الله يوم الأربع عمرة وهقعد أسبوعين أنزلهم تلاتة أربعة فى المرة إزاى؟!
ماشاء الله.. انت لقطة والله.. :) .. ده انت يابنى صاحب الموضوع مش انا..:o
أنا للأسف الاعداد اللى عندى معظمها يوم الاربع.. وكمان ماما مش بتخلينى احتفظ بيهم كلهم :rolleyes: ..
اولا.. مبروك العمرة.. ماشاء الله.. ادعيلنا بقى..:)
وثانيا.. اكتب على مهلك وبالطريقة اللى تحبها.. مفيش مشكله

واحمودى.. بيقولك عنده كل اعداد الدستور يابنى.. سيبه يكتب براحته.. زى ماهو عايز.. :D
يكتب كتير.. يكتب قليل.. المهم يكتب.. ;)

دافنشي
08-07-2007, 12:54 PM
لن أظل متابعا صامتا هكذا إلى الأبد..!

أولا التحية واجبة إلى العزيزة جدا سارة على ذوقها الراقي، ثم على موضوعها الذي يروق لي حقا! :nihihi:

البداية بـ "ناقص حتة" موفقة تماما.. أراها أجمل وأفضل قصائد علي سلامة حتى الآن.. هي قصيدة خاطفة.. "تخطفك" فور قراءتها ! :nihihi:

على مستوى الفكر والمعنى الجديد فأنا أحب علي سلامة حقا..
لكنه للأسف، على مستوى الموسيقى والوزن في الشعر، فإنه يكاد يحوله نثرا في كثير من الأحيان، وهذا مما يعيب أي شاعر..
لكن قصائده الموزونة هي حقا شعر حقيقي مما يروي الظما..

وكما قلت: تكفيني منه "ناقص حتة"..

أشكر الجميع هنا.. استمروا في وضع القصائد ههنا.. لأنني سأستمر في القراءة..! :nihihi:

مواطن مصري
08-07-2007, 04:34 PM
ده انت يابنى صاحب الموضوع مش انا
العفو :o .. لولا انك فتحتيه مكنتش فكرت أبداً انى أجمعهم ..
وكمان ماما مش بتخلينى احتفظ بيهم كلهم :rolleyes:
ماما طلعت قرار ان جبل جرانين الدستور اللى عندنا لازم يترمى قبل ما نسافر .. كل عدد من الدستور بأطلع منه قصيدة على سلامة ولو حاجة تهمنى أو تهم بابا أو ماما وبعدين بيترمى:rolleyes:
وأخرى.. بإسم.. قلم.. صادمة.. وحقيقية..
تصحيح صغيور .. دى لقيتها فى دستور17/5/2007 .. اسمها (سلك عريان) :)


وأيضا..



مش أنا امبارح
رحت من بيتنا في السيدة
للشغل في حلون

في سبع دقايق





ودى كمان لقيتها فى الدستور .. اسمها (البطانية)




ومع مجموعة جديدة:







إيه الحلاوة دى

مَعلِش إسْمَحْلى..
لو هَنتكلّم ع الحلاوة..
أنا تقاطيعى مُجْرِمة..
صحيح وِدانى كبيرة..
لكن مناخيرى مِنَمْنِمَة..
وكل ما اطلَع سِلمة..
يقُولولى شِد حِيلَك..
لسَّه بدرى ع السطوح..
عيونى جريئة..
جريئة..
لكن فى الحقيقة..
لا بتعرف تدارى..
ولا بتقدر تبوح..
شعرى مش ناعم صحيح..
لكن لايق على راسى..
ولما يِصدق إحساسى..
معرفش فين من روحى أروح..
بحبك لما بتستعبط..
وتقولى مالك..
بتبكى ليه..
ومن إيه كدة قلبك مجروح..
يا عم روح..


بأحبها قوى قوى .. لاحظوا جمال التعبير (صحيح ودانى كبيرة لكن مناخيرى منمنمة) .. لاحظوا روعة تعبيره عن ابتعاد تحقيق الأمل (وكل ما اطلع سلمة يقولولى شد حيلك لسه بدرى ع السطوح)







فَرَح طازة

وابتدى صدرك يزَيّقْ..
وابتدى شَعرَك يشيط..
والبراح بقى ركن ضيق..
واللى راح
مش شىء بسيط..
وابتديت تعرف يا شاطر..
أد إيه إنك عبيط..
المهم..
كنت عايز بس أقولك..
ولا أقولك ملوش لزوم..
قوم يا عم بينا قوم..
يللا نفهم..
من وشوش الفرحانين..
سر السعادة..
يمكن الدنيا تقابلنا بحد طيب..
طيب..
بيقولوا فيه دكان قريب..
لسة عنده فَرْح طَازَة..
فين الدكان ده..
يا عم..


دى كمان بحبها جداً .. أسلوب تعبيره فى بداية القصيدة عن مرور العمر وبداية ظهور أعراض الشيخوخة واكتشاف الواحد انه ضيع عمره جميل قوى..








لَبَن سَمَك سيراميك

بدعيلك يا ضَنَايا ربنا يحْمِيك..
من إبرة مسمومة جاهلة أو قاصدة تِأذيك..
من علبة لبن ببودرة السيراميك..(*)
معدش يابنى فى الفجر أدان ولا ديك..
ولا عَدش فى الوطن شبابيك..
بتطل على بُكرة..


(*)ولو ان الموضوع مشهور جداً لكن احتياطى لو كان فيه حد ميعرفش .. هنا هو بيلمح على القضية المشهورة اللى اتكشفت لغش اللبن ببودرة السيرميك..








الواد ميشو

ابنى الصُغير..
دمه خفيف شَرْبات..
من غير ما يقصد
ياما عَلمنى حاجات..
معدش بيحب الحواديت
ولا حكايات الشاطر حسن..
المهم..
بيموت ف الرُز باللبن..
ويغرق ف البَلوظَة..
قلت له نفسك تبقى إيه
لما تكبر يا ميشو..
قاللى يا بابا نفسى أبقى........
قلت له لأ
دى اتلغت يا حبيب بابا..
قاللى خَلاص
أبقى أنا ال........
قلت له ودى محجوزة..
قاللى ممكن يا بابا أبقى..
قلت له ودى للناس المحظوظة..
قاللى هوه بقى
يا بابا عايز أبقى..
قلت له ودى محتاجة وقت
وأنا كبرت
وأمك كمان سِتْ عجوزة..
قاللى خنقتنى يا بابا
تصدق..
قلت له جننتنى يا ميشو
يا ابنى نَقِى حلم ينفع يتحقق..
قاللى يا بابا بتسألنى ليه
طب قوللى إنتَ أحلم بإيه
وأنا أديلك شوية رز بلبن..








أحسن م القعدة ع القهوة

فَكَر يا عبد الجبار..
فَكَر يا عبد الجبار..
إزاى تبقى واد مشهور
وعليك النور
وف نشرة الاخبار..
أحسن م القَعدَة ع القهوة
اشتغل فى الفتوى
والطيبين ملايين
والعطشانين كُتار..
صحيح انتَ جاهل
واحنا نستاهل
ولسانك مُنشار..
العب ف الأساس
واخطف ودان الناس
ارمى ف عقولهم قطة
وف قلوبهم فار..
وخُدهُم معَاك فُسْحَة
على بئس المصير
فى النار..
بُص..
تتكلم عن الرضاعة
يفرحوا الحلوين
المراهقين الكبار..
وخش ع السرير
وفوايد الجرجير والتوابل
واكسب العطار..
وشوية ف الفن
وبِدَل الرقص..
واحنا تعبانين
ومليانين نقص..
وبالليل غير بالنهار..
واوعى تقلق خالص..
احنا أحسن ناس بننسى..
وبنسامح الشياطين
والمجرمين الكفار..
يعنى جَت عليك انت
ياعم عَبْ جبار..







شارع صلاح سالم

نَعيماً..
هَنياً..
وشُكراً يُدُومْ..
خليك زى ما انتَ..
عليا الطلاق ما تقوم..
وكام ألف سنة
والأمر مش محسوم..
يبكينا الفَرَح..
تضحكنا الهموم..
وكلنا ظالم..
وكلنا مظلوم..
زى شارع صلاح سالم..
من غير سبب رايق..
ومن غير سبب مزحوم..







تِركَب الجَمَل

أنا من مَدْرسة التَفَاؤُل
والبهجة والأمل..
ساعات من بُرج الحوت
وساعات بُرج الحَمَل..
يا سلام على سحر النيل
لما البَدر اكتمل..
والناى يقول مواويل
إحساس يهز الجَبَل..
صحيح فيه شباب عاطلين
ومش لاقيين عمل..
وفيه شوية قوانين
تِوَدى المعتقل..
لكن هناك عند الهرم
فيه ناس تلهوا وتَمرَح
وتركب الجَمَل..








مولود

مَولُود أنا..
معرفش أعيش مِتْكَتِف..
والدنيا ياما وياما..
وأهى لسه بتحدِف..
أفرح أغنى..
وأعشق وأنجرح..
وبيصعَب عليا..
لا ضحكتى مصنوعة..
ولا دَمْعِتى بإديا..
وأهو كلنا غرقانين..
وكلنا بنئَدِّفْ..








معرفش يا بابا

فَكَّرنى يا ابنى..
يوم التلات ننزل نشترى..
شوية حاجات..
وبالمرَّّة نِعدى نزور نِينَه..
وفَكَّرنى نصَلح الباب..
ونشوف شقة..
ف مشروع الشباب..
بَحَرى وبتطل على جِنينَة..
وفكرنى ندفع الإيجار..
وفلوس المدرس المَكَار..
اللى عمال يضحك علينا..
هوا إحنا يا بنى..
مش كُنا عَبَرنَا وانتَصَرنا..
وعَدِّينَا..
وللا أنا كان بيتهَيَألى يا وَاد..
مَعْرَفش يا بابا..
هُوَّ أنا كُنت معاكو..








جَت سليمة

القتل العَمْد..
مش جريمة..
والسرقة بجد..
مش جريمة..
والهزيمة بفعل حد..
مش جريمة..
والتلات زى الخميس..
شكل الحَد مش جريمة..
واللون والطعم والقيمة..
وحَسَن ونعيمة..
ومصر الجديدة..
والقديمة..
مش جريمة..
يا عم قوم..
نَفَّض هدومك..
جَتْ سليمة..

أحمد يحيى
09-07-2007, 09:48 AM
موجود ..

تعليق صغير بس على سبيل إثبات الوجود ..

منك لله يا محمد يا إيجيبشان ..:rolleyes:

مواطن مصري
09-07-2007, 10:32 AM
معلش بقى يا أحمد يا أحمودى :rolleyes:







حُمُّص الشام


يعنى أنا مَثَلاً..
أبقى قاعد ف البيت..
بتفرج ع التمثلية..
وبقزقز لِب..
وبشرب حُمُّص شام..
أو بشوف الأهلى والزمالك..
فى الدورى العام..
أو بَفتِكِر أنا ومراتى..
أيام الغرام..
أو بَعمِل زى الناس..
ما بتعمل ف الحَمَّام..
يُدخُل عَليَا حَد..
من غير لا إحم ولا دستور..
ويقوللى طِبقاً للدستور..
عايزينك..
طَبْ بذمتك ودينك..
ده اسمُه كلام..
معلش أنا بستفسر مِش أكتَر..
عشان لما نروح..
نروح ونيجى قَوَام..
طَبْ اشرَب الحُمُّص..!











صوت القاهرة

صُوت القاهرة شَوَاكِيش..
وخَبْط ورَزْع وزْعِيق..
عَرَبيات بَشَر..
وخْضَار..
وحديد وأسمنت ودقيق..
تسمعها بتْغَنى..
كأنها إنذار حريق..
وكل يوم إحساس يضيع..
وكل يوم بَرَاح يضيق..
وازاى هنسمع بَقَى..
صوت استغاثِة غَريق..









سين سؤال

الله يخليك..
خَلِيك معايا..
هو أنا لما انْضِرِب
عَلى قَفَايا..
تُعتَبَر إهانة..
ولما أقول اللى جُوايا..
تِبقى دى خيانة..
ولما كرامتى تِنجرح..
تِتْصَّلَح فين..
وإزاى..
عند الميكانيكى
وللا النجار
وللا بكوباية شاى
وأسبرين من أبو وَرَقة خَضْرَة
م الأجزاخانة..
طب هو أنا إسمى
فى أى كَشْف
وأى خَانَة..
سألت نائب دايرتنا..
قال إنه مرفوع عنه الحصانة
وخَالى شُغل..
وقَالّى انسى
وبُكرة تِبقَى زى الفُل..
وقلت له شكرا
والراجل كَتر خِيرُه
قَالّى مع السَلامَة..








يا باشمهندس

يا بَاشْمُهَنْدِسْ..
يا أُسطى يا رَيّس..
يا عَم يا كابتن..
يا دكتور..
ليه الطابور..
مش ماشى بالدور..
يا ناس الرحمة..
الأسانسير عطلان..
وكلنا ساكنين ف آخر دور..
هيه البَلَد دى..
مَفيهاش ناس طيبين..
ولا ناس عايزين..
بَقَلْنَا سنين بنلف مع التور..
عَشَان نعدى الرصيف نتمرمط..
وعَشَان نِضحك شوية..
لازم الأول نلطم ونصوت..
وعشان نغسل وِشنا..
لازم نشغل مَاتور..
إيه يا كابتن..









حُمُّص

تلف الدُنيا مهما تلف..
ومهما تِدُور..
ولِسِّه حُمُّص بيرقص
ع السلم المكسور..
ولِسِّه الباشا..
والشاويش عُكاشَة
وعبد المأمور..
ولِسِّه العمدة
وشيخ الغَفَر..
ولِسِّه المواطن
اسمه نَفَر..
ولِسِّه الحلم شنطة سَفر
وتصريح بالمرور..
تلف الدنيا مهما تلف
ولِسِّه لا بقدر
ولا بتقدرى..
تقوم ف القَطر حَريقَة..
نمسك ف خِناق الكمسارى..
ولِسِّه بنفرح
بافتتاح كوبرى الفَنْجَرى..
وكيس عيش
نُصُّه محمص ونُصُّه طرى..
وطريق دائرى
وفُسحَة ورحلة
لسوق العبور..





رجل الترابيزة

يا عم قُولْ كَلام مَنطِقى..
تخبط صُبَاع رِجْلَك..
ف رِجل الترابيزَة..
وتِبْكى وتشتكى..
وتحُط مَرهَم..
يفش الوَرَم..
ويرُوح شوية الألم..
وترجع تِتخبط..
وترجع تبكى تانى وتشتكى..
يا عَم شُوف قَلْبَك..
وللا ده مش بتاعك..
يا عم شوفلك حَل..
يا تبيع الترابيزة..
يا تِقطَع صُباعك..









ورحمة أمى

عندنا هَرم وعلم وأعياد للطُفُولة..
وعيادات للعِلاج بس على طول مَقْفُولة..
وأرقام تليفونات وقت الأزمَات مَشغُولة..
وعندنا ألف جامعة..
وشكُوكُو وأبولَمْعَة..
وناس طَرْشَة بَس سامعة..
وكَرَاسى كتير مسئولة..
وعندنا أولاد فى الشَوَارع..
لا راحوا كى جى وان..
ولا شافوا سَنَه أولى..
بتتكَلِم جَدْ..
آه ورَحْمِة أمى..
ورحمة أمك...
مَعقُولة...













مسافر

نفسى اشترى..
شِبْرين فى حضنك وارتوِى..
فِكْرِكْ مسافر أَغْتِنى..
خُدِى اللى حِيلتى..
الهدمتين والقِرشينات..
بس استرى عرض البنات..
لو حَسِّبنا على دَمِنا..
فى قلوبنا مات..
لو بُكْرَه فات..
واحنا بياكُلْنا السُكات..
كل الأمانى الممكنة..
تبقى يا دُوب..
دمعتين..
فوق صورة باهتة ملونة..













كده وكده

من حَقِنا نِحلم..
ولو كِدَه وكِدَه..
ونشوف الدنيا حلوه..
مع إنها مِش كِدَه..
نحلم بَس وخَلاص..
ونقوم الصُبح عادى..
نقابل نفس الناس..
نحلم حتى ف سكات..
ونشوف حاجات حاجات..
مثلاً الكون جميل..
والنيل بقى ألف نيل..
وطن مَلوش مثيل..
فى الدُنيا كُلها..
مثلاً..










للأسف

لَما الحُمُول تِزيد..
نرجع ونسْأَل من جديد..
ومنلاقيش غير الأسف..
ناديت على القَمَر أنا..
عطشان وَنس..
بَص بخَجَل لِيه واتكسف..
ومشيت كتير..
وداريت الحزن ف ألف بير..
بس اتْكَشَف..
مشيت أمَل..
ومشيت فَرَح..
ومشيت زَهَق..
ومشيت كِده من غير هدف..
وقلت من قلبى كلام..
معرفش ليه كُله اتحذف..
كان نِفسِى أغَنّى للسلام..
لكن حبيبتى..
للأسف...!

مواطن مصري
09-07-2007, 11:55 AM
أجمل من كدة

يا ريتْنى أجْمَل مِن كِدة..
أطيَب وأقوى مِن كِدة..
ويا ريتْنى حاسس بالرضَا..
وأنا كُنت أقولِك..
آه بَحِبِّك..
من زمان أوى كِدَه..
يا ريتْنى..
فارس عَ الحُصَان..
وف إيد فَرح..
وف إيد أمان..
ولا اتقابلنا من زمان..
فى زَمَن جميل عن كِدَه..
يا ريتْنى..
أجْمَل مِنْ كِدَه..










م الآخِر

بُصْ..
ها أقُولكْ م الآخِر....
أنا عندى عربية مركبتهاش..
ومعايا فلوس مكسبتهاش..
وجوزونى بنت حلوة..
محبتهاش..
واشتريت بدلة جديدة..
ملبستهاش..
كَسّرت الحَمّام وغَيّرتُه..
محستش بأى انتعاش..
خدت بَعضى على جَنب..
فى يوم كان حر رطوبة..
وقولت لروحى إيه يا عم..
إنتَ طُوبَة..
قاللّى لأ يا صَاحبى..
دى حِسبَة ومَحسُوبة..
أنا أصلى زمان..
لَمَست قلبى غنوة حُب..
جميلة جميلة..
لكن يا خسارة..
محضنتهاش..








كارت جديد

جِبت كارت جديد وشَحَنْت..
وسمِعت الرصيد انبَسَطْ..
وهيصت وقُلت أطلبها..
طلبتها ولسه هقولها..
قالتلى..
الأسانسير عطلان..
وغسيل الجيران..
والواد خَد الدُور سُخْن ملهلِب نار بَردان..
وإن لقيت بُرْتُقان فى سِكتَك هات..
ولو عديت على أجزاخانات..
ابقى رنلى..
اِسمع..
قَفَلت وقعدت ع الرصيف..
أبص ع الدنيا والدنيا تبصلى..
وقفت قدام الأجزخانة أبحلق ف الإزاز..
صَحَانِى صُوت الصيدلى..
عايز حَاجَة يا أستاذ..
قُلت له..
تشترى التليفون ده ببلاش..
ومن ساعتها مكلمتهاش..











م الأول

بُص..
على مهْلَك تَانى وواحدَة واحدَة..
وم الأول ومن غير تَهْتَهه..
اتكلم..
قُول زَعَق..
اصرُخ بقى..
يعنى إيه..
عايز تقوللى إن فيه عصفور..
من غير نور وغُنا وزقزقة..
ودى أول مرة تَاخُد بالك..
إن الدُنيا بَقت ضَيَّقة..
ده انتَ بتستهبل بقى..!
انتَ كِدَة عَلى طُول..
سايق الهَبَل ع الشيطنة..
توَقَع الحاجات..
وتعاكس البنات..
وتقول مش أنا..
ده انت بتستعبَط بقى..!
انت عايز تفهمنى..
انك مش عارف الغَلَط من الصح..
يعنى انت خَلاص..
مفيش فيك أمل..
بالسلامة بَحْ..
يعنى أنا لو جِبْت علبة صفيح..
فيها شوية كولا..
وشربت وقلت أحْ..
مشاكلنا هتتحَل..
ده انت بتتدلع بقى..!






فيديوهات:

أجمل من كدة & م الآخر
http://www.youtube.com/watch?v=Wdyu7IS5Qtw&mode=related&search=


م الأول & كارت جديد
http://www.youtube.com/watch?v=g82z8T-K8cM&NR=1



لى رجاء منك .. أبحث عن قصيدة له لا أعرف إسمها.. سمعتها منه فى برنامج العاشرة مساءا..
يُذكر فيها أن الراجل رجل والست ست.. وان رجل يقول لإمرأة أنه سيكون هو الرجل ولابد ان تطيعه وأشياء من هذا القبيل.. ثم يسألها فى نهاية القصيدة عن مرتبها.. فتقول له وانت مالك فيقول لها انا مش راجل انا عيل.. حاجه زى كده يعنى :D
المهم ان القصيدة هذه أعجبتنى للغاية.. وبحثت عنها بلا جدوى

وجدتها

ملقيتهاش فى الدستور بس لقيتها فى فيديو وهو بيلقيها بنفسه .. معرفش ان كان هو ده النص اللى قاله بالظبط فى العاشرة مساء وللا غيره شوية:



هِىَ بتقول..
قاللّى مفيش أحسن م الصراحة..
قلت له ابن حَلال..
قاللّى اسْمَعِى..
عاداتنا وتقاليدنا..
قلت له دى مفيهاش فصال..
والراجل راجل..
والسِت سِت..
قلت له مفيهاش فصال..
قاللّى إنتى مرَتبك كام..
قلت له وانتَ مَالَك..
مش الراجل راجل..
والسِت سِت..
قاللّى يا ستى..
ده كلام عيال..!



اللينك من يو تيوب .. هو بيقولها بعد ما بيقول (ورق عنب)

http://www.youtube.com/watch?v=lvG7Zfxkgtw&mode=related&search=
فيه كلمة هو قالها مش وحشة قوى ولا حاجة بس حسيت انها مش مناسب قوى انى أحطها هنا فغيرتها..

high hopes
10-07-2007, 11:23 AM
:==:
مش عارفة اقولك ايه والله.. ربنا يخليك..
انا لسه مشفتش الفيديوهات بس القصيدة دى كنت هتجنن عليها :D
وطبعا غير جهدك فى كتابة بقية القصايد.. ربنا يكرمك يارب..
بالنسبة للكلمه انا عارفاها من غير مااشوف الفيديو :D
فاكراها من المرة اللى فاتت..:) معاك حق.. ملهاش لازمة..
دى قصيدة انهاردة..


بعد تلاتة ونص

كانت بعد تلاتة ونص
ولسه الشارع زى ماسيبته..
ساكت هس..
كان شباكها لسه موارب
بس مفيش احلام بتبص
لبنى وبين البيت حواديا..
اطلع ولا النوم ميجيش..
واسأل..
يمكن متقوليش..
كان فى إيديا صورة ومفاتيح..
متعلقة فى سلاسل فضة
غاب الضى من المصابيح..
قمت جريت م الخوف والخضة..
فين الشارع ..
فين البيت..
فين الناس وأصحابى..
وفين الفجر عشان اتوضى..

دافنشى .. ايوة كده.. الناس اللى بتقرا ببلاش دى :q على الاقل تيجى وتقول احنا بنقرا وكتر خيركوا..

مواطن مصري
10-07-2007, 05:12 PM
مش عارفة اقولك ايه والله.. ربنا يخليك..
العفو :o




قول معايا

قول مَعَايا قُول بجد..
هىّ عيشة ولا موتة..
ولا فوتة فى حارة سد..
قول لحد..
أى حد..
حد رايح..
حد غايب..
حد جَاي..
حد لسه فينا فايق..
حد حَىّ..
قول يا عَم..
قول يا هَم..
قول لحد لسه فينا..
عندُه دَم..
قول مَعَايا..
صوتى لسه مَنتَهَاش..
ليه بنرْخَص..
ليه بنرضَى نبيع بلاش..
قول يا عَم..
قول يا هَم..
قول لحد
لسه فينا عندُه دَم..
هىّ عيشَة ولا موتَة..
ولا فوتة فى حارة سد..









زعلان شوية

أنا أَصْلِى زَى بَقِيةْ النَّاس..
ماشى كِده..
عايش وخَلاص..
بتحَيَّر واتجَنِن واتغَيَّر..
وأقُول يا ناس..
الضحك شَكْل البُكَا خَالِص...
تلامذة وفصُول ومدارس..
يا مَنْجَا لِيه..
طَرْحَة فى مَارس...!
مَالَك..
زعلان شِوَية..
أنا أَصْلِى..
كنت زَمَانْ حَبّيب..
وشِعْر إيه..
وغنا ومَكَاتب..
ليه كل مَا أمْسِك..
هى تسِيب..
مَالَك..
زعلان شوَية..


القصيدتين اللى فوق دول غناهم وجيه عزيز (http://www.rewayatnet.net/forum/showthread.php?t=25458) فى ألبومه (زعلان شوية)










اتنين وخميس

شُوفْ..
هِىَ بتيجى على أهْوَن سَبَبْ..
والكلام صُداع..
والسكوت دهب..
إحنا نحب بعض ف رمضان..
ونصوم اتنين وخميس ف رجب..
ونشجع المنتخب..
ومش مهم..
مين خسر ومين غَلَب..
وملناش دعوة..
بالناس اللى ف الشارع..
دول فاضيين..
وقلالات أدب..
وإحنا كده مرتاحين..
ومش غاويين تَعَب..
هوَّ مش العصر وجب..
ياعم قُوم..
دا الفجر خلاص....!


أسلوبه جميل قوى فى التعبير الدقيق عن أسلوب تفكير كتير من الشعب المصرى السلبى حاليا المهتم بالتدين السطحى وكرة القدم أكتر بكتير من محاولة التغيير وبيعتبر الناس اللى فى المظاهرات (فاضيين وقلالات أدب) .. ودعوته ليهم فى النهاية (يا عم قوم دا الفجر خلاص)













التوكيل

صباح الخير..
مين ده اللى مَصْر
عملت له توكيل
بالبيع لنفسه وللغير
وكمان بنَقْل الملكية..
مين ده اللى مصر
وقعت أوى كده فى هَوَاه
وكل ما يتكلم تقول الله
وكل دقيقة تغنى لُه أغنية..
ومين ده بقى اللى معاه
مفاتيح الشاى والسُكر
والهَوا والنور والحُرية..
طَب إيه رأيك..
التوكيل دَه مَضرُوب..
بُص كده يا عَم عطية..
معرفش يا ابنى..
تعالى نسأل
فى الشهر العقارى..!











حرامى زمان

حرامى زمان كان جدع وإنسان..
يسرق حبل غسيل..
شراب منديل فستان..
جوز فراخ من على سطُوح الجيرَان..
ويتقِفِش ينضرب ويتزَف ويتهان..
وينكسف على دَمُه..
ويسمع كلام أبوه وأمه..
وممكن يتوب..
وحرامى دلوقتى أشجَع الشُجْعان..
يهبش ويحف ويسف..
لا يخاف ولا عِينُه ترِف..
ولُه ألف لسان..
ومبيسمعش حَد..
ولا ينفعش يُتوب..











تيجى

تِيجِى نِهرب م الحَقيقَة..
م الصور..
من خَبَر عاجل يُخُض..
تيجى لا نفهم ولا نعرف..
ولا نقدر نرُد..
نهربَ م الأمَل..
نطلَّع بطاقة بدون عَمَل..
نبقى يعنى ف اللذَاذَة..
ويبقى ملناش عازة..
زى كل شىء جميل..
مستحيل..
هِىَ كِدة..
وملهاش بديل..
تعشقها..
تيجى رجلك..
وتيجى تهرب بجلدك..
تِنْجرِح..
يوجَعَك قلبك بجد..
لا تقْبَل أى حاجة..
ولا تبقى أى حَد..
تيجى....











بُمب وصواريخ

عشان ضَعيف فى النَّحْوْ
أنا باخد درس تاريخ..
وقالولى عندك حساسية م المانجة
بلاش تاكُل بطيخ..
ولما خُفْتْ من الحَصْبَة
اشتريت بُمْبْ وصواريخ..
وكل طلعة نهار
بخاف من عربية بحمار
تعطل حلمى النوَوى
ومقدرش أوصَلْ المريخ..
بس أنا بَنْسَى
والحكاية بتخلص
لما صاحبى بتاع دسوق
يبعتلى شوِّية فِسِيخ..
وأفقد الذاكرة..










صوت الشوارع

ينّدَهلى صوت الشوارع..
أفتح الشباك أتفَرّج..
آدى واحد حزين هناك..
وجنبه واحد بيهرج..
ومن بعيد..
تحضنى فرحة..
وأقول خلاص ده بُكره عِيد..
لكنى ليه بَارجَع بَليد..
يصطادنى حُزن من غير شِبَاك..
أصرخ وأقول أنا مش ملاك..
من حقى أغلط واتلَخْبَط..
وانسى الكلام..
وأنام على أى جَنْب..
وأقول م المغفرة..
أحس بقسوة الذنب..
وحلاوة المغفرة..
من حَقّى أرفُض..
وأقطّع ورقة الأسئلة..
واطير..
أطير ف الهوا..
هوا احنا فعلا سَوَا حبيبتى..
ولا ده صُوت الشوارع..










ورد وشمع

جابت وَرْد وشَمْعْ..
وظبطت الإف إم..
وطَفتْ النور..
وقَالتى..
وانت معايا بتحِس بإيه؟
قلتلها ولا حاجة..!
قامت..
ولعت النور..
وراحت غابت حَبَّه..
ورجعت سألتنى برّقَة..
طب لما بأغيب عنك..
بتحس بإيه؟
قُلتلها بَرْضُه ولا حاجة..
قالتْلِى بجَد..
قُلتلها أمَال هِزار..
قالتلى..
والنِيلة الأغانى اللى بتكتبها
والزفت الأشعار..
قُلتلها بس أمى قالتلى..
اللى بيكدِب بيروح النار..
بصتلى من فوق لتحت بكل احتقار..
وقالتلى..
إبقَى خَللى أمَّك تنفَعَك..









غسيل قلوب

هى القُلُوب بتتْغسل
زى الهدُوم..
وإزاى بتغرق ف الغرام..
وإزاى تعُوم..
وإزاى بتبقى طُوق نَجَاة..
وبتبقى شَطْ..
وإزاى بتُنْخُل الكَلام..
وإزاى بتعرف أى خَطْ..
وإزاى بترقُص م الفَرَح..
وإزاى بتقتلها الهُمُوم..
وإزاى بتبكى وتبتسم..
وإشمعنى يعنى بتترسِم
فوق الشجر...
ساعات بتدْبَل ف الربيع..
وساعات بتعشق المَطَر..
ليه لما بتْبَطّل غُنا..
بنحِس فعلا..
بالخَطَرْ..

high hopes
11-07-2007, 11:35 AM
قصيدة اليوم:


فارس


بتنسى يا فارس ..
فلوس المدارس..
وكأنك ولا فاكر خالص..
ولادك ياخويا
بتدرس لغات..
ده غير الباصات ..
ولا الدروس..
هاتبعت فلوس..
هاتنسى يافارس..
أتارى لأسامة
وجزمة سلامة ..
وشنطة منال..
ما هُمّ العيال..
بتنسى يافارس
قماش الستاير..
وداير ياقلبى..
فى نفس الدواير..
وبارجع الاقى..
الصغير صغير..
ونفس الشوارع بتحلم تغير..
هاتنسى يافارس
..فى أول اجازة
نشوف الأراضى
فى مصر الجديدة..
يا إما المعادى..
هاتنسى..
بتنسى..
والله بتنسى..
يا فارس..

مواطن مصري
11-07-2007, 02:03 PM
فيديو ل (فارس) :
http://www.youtube.com/watch?v=qtz5q8Tg_7o&mode=related&search=



ودى آخر مجموعة عندى:
خلاص يا أحمودى


رياضة

بَقُولَها..
أنا حاسس بفَرَاغ..
قالتلى..
إلعب رياضة..
قُولْتلْها كل الحاجات..
ملهاش طعم..
قالتلى يِقْطَعْنى..
أكون عَمَلْتْ القَهْوَة سادة..
قُولْتلْها..
محتاجين نقَرَّب شويّة..
قالتلى طب هاشِيل أنا الكُرسى..
واعدِل انتَ السجادة..
قُولْتلْها أنا تعبت..
قالتلى ادخُل ارتَاح شوية..
قُولْتلْها حرام بَقَى..
كفاية كِدة..
بزيادة...!!











ربنا يسهل

بَقُول لَهَا..
بحبك بحبك بحبك..
قالتلى..
كل ده كِذْب..
قُلتلها صدقينى..
لا أنا فى المعارضة..
ولا ف الحزب..
قالتلى..
بس السُّكُوت خِيبَة..
ولولا العيبة..
كنت أقُول..
وأقُول كَمَان..
الله يرحَمَك بقى يابا..
ويا ميت خُسارة ع الجدعان..
قُلتلها وطى صوتك..
بلاش جنان..
كل الحكاية..
أنا حاسس بشوية سخونة..
وبَرْدان..
ادينى بس انتى شوية حَنَان..
وربنا يسهل..










ماخدتش ولا اديت

لما وِشِى بَقَى أصْفَر لَمُونَة..
ماخَدتِش ولا ادِّيت..
ولما اترميت ف قلب الطاحونة..
ماخَدتِش ولا ادِّيت..
ولما شَميت ريحة شياط..
ووقعت فُوق دماغى كُل الحَاجَات..
ماخَدتِش ولا ادِّيت..
ولما قالولى من إيه الدم اللى فى وِشّك..
فين رُوحَك..
حاسب قلبك بيغشَّك..
ماخَدتِش ولا ادِّيت..
ولما حسيت بألَم ف راسِى..
ولقيتنى ناسى..
اسم ابنى الوَحيد..
ولما شفتك رايحة لحتة بعيد..
ماخَدتِش ولا ادِّيت..
لحد ما لقيتنى مرَّبط ف جِبس وشاش..
وشايف كُل شىء طَشَاش..
وحواليَّا ناس كتير معرفهاش..
بيقولولى مين اللى رماك م القَطْر..
يا صابر..











بطل الكاس

حد فاكر التعديلات..
ولاّ انتَ يا عادل..
ولاّ انتى يا جمالات..
يا نهار أسود..
طب هانحط اختيارات..
حد فاكر الاستفتاء..
ولاّ انتَ يا محمد..
ولاّ انتَ يا جرجس..
طب ايه لُزُوم الخناق..
حد فاكر الأمْن..
حد فاكر الصناديق..
ولاّ طالعين من ثانوية عامة..
رايحين مكتب التنسيق..
وع الشط التانى لَمّة..
بتتفرج ع الغريق..
يعنى مفيش حد فاكر حاجة..
ولاّ انت يا عباس..
قبل التعديلات..
الأهلى بطل الدورى..
وبعد التعديلات..
الأهلى بطل الكاس..
بس كِدة..
خلاص..










الممر

طَوّلْت عَليك..
لأ..
قُول طَوِّلْ..
بصراحة..
أنا مش مرتاحلك م الأول..
لكن فعلا فعلا مُضْطَر..
أصعب شىء ف الدنيا..
إنك تُسْكُن فى مَمَر..
والرايح والجاى يشوطَك..
شُفْت...
كنت هَفُوتَك..
إزاى تبقى ف بيتك..
وسط عيالَك..
وبتنضر...
عارِف..
أنا ماكرهتش فى حَيَاتِى..
أد اللا بَرْد..
واللا حَر..

أحمد يحيى
11-07-2007, 02:12 PM
طيب يا محمد..:dodo:

لم أبدأ بعد في القراءة، ربما لإحساسي بالـ ( خضة ) من العدد، بالإضافة للفيديوهات المرفقة..

بصراحة؛ عمل و جهد مميز منك يا عزيزي، بالإضافة للفكرة الرائعة من سارة..

شكرًا لكما معًا، و أرجو ألا يموت الموضوع بعد ذلك يا سارة..

حافظي على استمراره بوضع المزيد، و سأستمر أنا أيضًا - إن شاء الله - في القراءة و التعليق..:D

high hopes
11-07-2007, 02:26 PM
أحمودى..
الموضوع موضوع محمد والله.. هو اللى بجد مش عارفة اقوله ايه..
ربنا يكرمه.. :)
المشكلة ان اللى عندى خلاص.. خلص..:rolleyes:
اللى ناوية اعمله ان شاء الله انى اتابع الدستور عشان اجمع كل القصايد..
باذن الله..
انا كمان مقرتش كل اللى محمد جابه.. :D.. الحاجات دى عايزة وقت مخصوص يعنى..
عشان تتقرى بإستمتاع.. :)
بس عجبتنى.. غسيل قلوب.. وورد وشمع برده.. :)

ومحمد.. كويس والله انك خلصت.. عشان حرام بجد تكتب ده كله.. :)
باذن الله الباقى يبقى عليا..
وباذن الله الموضوع مش هيقف طول ما على سلامة بيكتب فى الدستور.. :)

high hopes
15-07-2007, 02:24 PM
رياضة


بقولها..
أنا حاسس بفراغ..
قالتلى ..
العب رياضة..
قولتلها مش قصدى..
الحاجات ملهاش طعم..
قالتلى يقطعنى.. أكون عملت القهوة سادة..
قولتلها مش كده..
محتاجين نقرب شوية..
قالتلى طب هشيل الكرسى وانت اعدل السجادة
قولتلها انا تعبت..
قالتلى طب خش ارتاح شوية..
قولتلها حرام بقى..
كفاية بزيادة..
بزيادة..!!

high hopes
30-07-2007, 08:20 PM
حرامى زمان


حرامى زمان..
كان جدع وطيب وإنسان..
يسرق حبل غسيل..
شراب منديل فستان..
جوز فراخ..
من على سطوح الجيران..
ويتقفش ينضرب
ويتزف ويتهان..
وينكسف على دمه
ويسمع كلام أبوه وأمه..
وممكن يتوب..
وحرامى دلوقتى..
اشجع الشجعان
يهبش يخطف ويسف..
لا يخاف ولا عينه ترف..
وله الف لسان..
ومبيسمعش كلام حد..
..ولا ينفعش يتوب

high hopes
31-07-2007, 05:28 PM
رجل الترابيزة


ياعم قول كلام منطقى..
تخبط صباع رجلك..
فى رجل الترابيزة..
وتبكى وتشتكى..
وتحط مرهم..
يفش الورم..
ويروح شوية الألم..
وترجع تتخبط..
وترجع تبكى تانى وتشتكى..
ياعم شوف قلبك..
ولا ده مش بتاعك..
ياعم شوفلك حل..
ياتبيع الترابيزة..
يا تقطع صباعك..

high hopes
03-08-2007, 05:05 PM
جدول الدورى


فيه يوم كده بيبان من اوله..
لا تقدر تبتديه.. ولا تعرف تكمله..
المهم..
رميت دماغى عالمخدة..
ورغم التعب معرفتش انام..
فتحت الجورنال اتخبطت..
فى جدول الدورى العام..
لقيته شبهنا وبنفس الترتيب..
معرفش من كام سنة..
فريق عالقمة متربع..
وبيبرطع لوحده قدام..
وهتيفة وأعلام..
يشترى ويبيع..
لا حد يسأله منين..
ولا ازاى ولا بكام..
وف ايده كل مفاتيح السعادة والأحلام..
والقضايا والمحاكم..
ودفاتر الشهر العقارى..
والمواليد والوفيات..
وجداول الانتخابات..
وارقام جلوس التلامذة..
وبيكسر المرفوع ويشيل الهمزة..
وهو البطل الوحيد فى جميع الأفلام..
وفريق فى المنطقة الدافية..
كل كام سنة يكسب مرة..
بالعافية..
ولو نجح فى الفيزيا..
يسقط تاريخ وجغرافيا..
عنده شقة تمليك فى مدينة نصر..
كرانيش فى السقف وأرضيات رخام..
مسموح له فى الخميس الأول..
من كل شهر..
يمارس الحب والغرام..
ويصحى يصليله الجمعة..
ويتغدا ملوخية..
ويغنى فى الحمام..
وباقى الفرق..
تقريبا بتلعب حافية..
لا حارس مرمى..
ولا دفاع ولا هجوم..
وتنام وتقوم خايفة..
ساكنة فى حته فى مدينة السلام..
ومفيش طبعا فى السقف كرانيش..
ده يادوب نص جير..
ونص كسر قيشانى..
من سوق الامام ..
وساعات تعيش فى خيمة إيواء..
وتعمل مالنكته لقمة.. وغطا وفرشة..
وعندها بنت دبلوم تجارة..
وعيل صغير..
صبى ميكانيكى فى ورشة..
وبتكافح من اجل البقاء..
تسمع الأغانى من بعيد..
وتتفرج عالدنيا فى مراية الحلاق..
ومطلوب منها فى نهاية كل موسم..
تشكر الأمن..
وتهتف للبطل..
وتشكر الحكام..

Fankash
03-08-2007, 10:36 PM
الراجل دا عاجبني جدًا

خصوصًا



الفاتحة على الأموات

وفضلت أستنى أستنى..
لَحدّ ما عدى آخر قطر وفَات..
حَزنت قَعّدت أعيط أعيط..
تعبت م العياط..
قلت أتمشى أتسلى..
أتفرج ع الشوارع والناس والعربيات..
زهقت..
قُلت أرتاح..
سنَدت على روُحى..
إتلخبَطت جُوايا كل الحَاجَات..
مدّيت إيدى ف جيوُبُى..
لقيت شوية ورق قديم..
وصور وكروت تليفونات..
قلت أكلم مراتى..
افتكرت إنها خدت الدوا..
ونامت من تلات ساعات..
قُلت أكلم أخويا..
افتكرت إنه طلعِ مَعَاش مبكر..
وكَاره تاريخُه..
ومركّز ف التّأمينات..
أكلم أختى..
هتعيد وتقول نفس الحكايات..
أكلم خَالى..
افتكرت إنه غتت غَتَاتَة..
ومعايا أنا بالذات..
أكلم خالتى..
قُلت يا واد..
دى كانت خالتى وخالتك..
واتفرقت الخالات ..
أكلم صاحبى صلاح..
افتكرت إنه سافر العراق..
وفى إحتمال يكون مات..
قُلت أنا أعمل دماغ..
بس معرفش حد بتاع مُخدَّرات..
قُلت أمشى ف مظَاهرة..
لقيت العساكر راجعين..
مشطبين علَى كل الُمظاهرات..
قُلت اتصل بالسّادة المسئُولين..
هايتهمونى بإزعاج السلطات..
قُلت يارب..
هُو أنا إيه؟
وليه؟
ونسيت إيه؟
وقطر إيه اللى فات؟
الله يرحمك بقى يابا.....
والفاتحة على كل الأموات..


باحبها جدًا

و الباقي طبعًا منزلش عن المستوى...
دورتله في يوتيوب لحد ما لقيت حاجات كتيرة
و تابتعه في الدستور الاسبوعي...


كملوا ... حاجات رائعة

high hopes
12-09-2007, 02:49 PM
زَلبطّة *


كان شعرى ناعم جميل..
وعيونى شايفة النيل..
فضل ونعمة من ربنا..
طاهر برئ حر..
أنا إتخلقت..
معرفش بقى..
بعد كده إتحلقلى زلبطة..
ولا أنا بمزاجى حلقت..
ماشى فرحان..
وخدت راحتى مع الفرح..
والأمل..
وزى ما تقول كده..
إتبحبحت..
وهى لحظة يا معلم..
معرفش نمت..
غفلت..
أو يمكن سرحت..
إتكعبلت بقى فى إيه..
أو ع الفاضى يمكن سندت..
لاقيتنى طاير فى الهوا..
وع الأرض طاخ..
جايز أكون إتزحلقت..
وقعت من إيدى صينية البسبوسة..
والفينو أبو سمسم..
كنت عايز أفرّح العيال..
الهبدة كانت تقريبا جامدة
لأن نفسى راح..
ودمى ساح..
كأنى إندبحت..
فضلت أندب ف حظى..
وأقول لروحى يا عم خلاص..
إنت يعنى إمتى عملت حاجة..
وفلَحت..
دى الدنيا راحت..
وإنت يادوب بصيت
وإستغربت قوى وتنحت..
المهم أنا ساعتى راحت فين..
وفين دبلة الجواز..
وأقول لمراتى إيه..
إتسرقت..؟
أقولها الشارع كان ضلمة..
وفيه ماسورة ضربة..
ماحنا مقضينها..
فحت وردم وفحت..
ولما خدت نفَسى وريحت..
قُلت أنفض هدومى..
وأرجع محترم تانى..
لا لقيت القميص..
ولا لمؤاخذة.. الحاجات اللى تحت..
والحمد لله..
إنها جت على أد كده..





*فرحة خاطفة لمواطن بسيط.. فرحة ما تمت..

مواطن مصري
20-09-2007, 11:16 PM
بمناسبة رمضان: :)



تحية العَلَم

يا عم ده شهر خير ..
بركة ورحمة وكرم ..
رمضان كريم ..
وربنا يوعدنا جميعاً ..
بزيارة الحَرَم ..
ويا بخت من بات مظلوم ..
ماشى يا عم ..
طب واللى ظلم ..
واللى باع ..
واللى قبض ..
واللى سَلِّم واسْتَلَم ..
يتسْحَر على مَركِب ف النيل ..
ويتصور جنب الهرم ..
تعالى نحسبها كده ..
بالورقة والقلم ..
ماهو مش معقول ..
دولْ بس اللى بيفهموا ..
والباقى بقر وغَنَم ..
ودولْ بس المؤمنين ..
والباقى بيعبد الصنم ..
تصدق إن فيه ناس ..
بتفتكر مصر بس ..
ساعة النشيد الوطنى ..
وتحية العلم ..
وأشوف وشك بخير ..
وأقولك وإنت طيب ..
تقوللى ربنا يعديها على خير ..
طب إزاى ..
ولا بلاش بقى ..
اللهم إنى صايم ..









يمْكِن تمَطَّر

اكتب يا عم ..
إنتَ لسه بتسَطَّر ..
ده الورد نايم ع القهاوى ..
وع الأرض متْنَتْوَر ..
قالوله ذاكِر ..
ذاكِر وجاب مجموع واتْشَطَّر ..
قالوله اغسل وشك ..
راح واستحمى واتعطر ..
قالوله بُكْرَه ..
ومفيش بُكْرَه ..
وبفضل مستنى يسْتَنْظَر ..
ولما قال آه ..
قالوا له إيه مش عاجبك ..
ده إنتَ فى نعمة هاتتبَطَّر..
وأهُو لسه ع الأرض مَرْمِى ..
يمكن تمطر ..
على فكرة ..
صعبة أوى ..
لما الدم يتعكر ..
أنا نفسى أقول ..
وأقول أكتر ..
بس خايف الكلام اللى جاى ..
يكون بيفطر ..
اللهم إنى صايم ..

ورد الذرا
11-10-2007, 02:11 AM
انتوا وقفتوا ليه؟ :)
أنا مش مهووسة بعلى سلامة أوى بس خدوا القصيدة دى..بتعجبنى ،على ماأجيبلكم (قصيدة اليوم)

من أول هنا

عَارفَه يَامًه..
أنا حاسس إن الموتْ
ما خدش مِنّك غِير الطّرحة
والجلاًبيّة السودة..
ما أنا كُل ما أعدى
جنب الأوضة..
أسمع صوتِك..
وانتى بتضحكى ع الدنيا
وبتدعى لي..
رُوح..
ربّنا معاك..
ها تسافر..
وها ترجع مجبور الخاطر..
وهاستنّاك..
طب اسندي على كتفي..
بكرة تقومي..
بكرة تخفّى
عارف مين ياابنى
بيُقع ويقوم..
أوعى تدوّر ع الدفا
في فلوس وهدوم..
وماتنساش تحّوش شوية
أصحاب..
وافرح أوى..
لما يدق الباب..
وتلاقى حد بيحضُنَك..
لوجه الله..

ياه........
فاكرة يامّه لما كنتى
تعملي البصارة..
وتدي منها لأبلة سارة..
يرجع ف الطبق رز باللّبن
يرُوح لأم حسن..
برجع صينية بسيسَة..
تدى منها لخالتي بيسه..
يرجع الطبق مليان حَب..
معقول فيه كدة قلب..
عارفه يامَه..
النهاردة بقيت بخاف بجد..
بخاف من أي حاجة..
ومن أي حد..
بخاف غصب عنّى..
أتخبط في حد..
أو أطلب من حد يسأل علىّ
لحسن يعمل محضَر
ويرفَع قضية
ويُطلب تعويض..
من أول هنا يامّه..
لازم نبدأ مِن جديد..
هو الفرح ليه يامّه
شكله لسه بعيد..
ادعى لي.

ورد الذرا
12-10-2007, 03:09 AM
القصيدة المنشورة فى (الدستور)لهذا الأسبوع...

الضريبة

مش غريبة..
ندفع الأوجاع ضريبة..
قسّمى الأحزان شرايح..
عبّي دمعي في الصفايح..
واسألي عمري..
اللي رايح..
المصيبة ..
لسة شايلك ف العيون..
أجمل حبيبة..
قولي كِذبة..
حُبي ليكى يبقي حِسبة..
والأماني بنسبة..
وانتى عِزبة..
للي ماله فيكى حِسبة..
المصيبة..
لسة شايلك ف العيون
أجمل حبيبة..
مين اللي قرر..
يقتل الحلم..
في عيون كل الطيور..
ليه تسلّمينى..
من طابور تانى لطابور..
قيدي البخور..
بركات جراحنا المُزمنة..
كل الأماني الممكنة..
تبقي يادوبك دمعتين..
فوق صورة باهتة ملونة..
سايبة الجراح ليه تهدّنى..
إيه فيكى تانى يشدنّى..
ده أنا اللي حبي عزّزِك..
وانتى اللي عشقك ذلني..
لسة ياهبلة بتسألى..
بتحبنى..
نفسي أشترى..
شبرين في حُضنك وارتوى..
فِكرِك مسافر اغتنى..
خد اللي حيلتي..
الهدمتين والقرشينات..
بس أستُرى عرض البنات..
لو حسّينا على دمنا..
في قلوبنا مات..
لو بكرة فات..
وإحنا بياكلنا السُكات..
كل الأماني الممكنة..
تبقي يادوبك..
دمعتين..
فوق صورة باهتة ملونة..

ورد الذرا
19-10-2007, 04:35 AM
القصيدة الأسبوعية :rolleyes:

غلطة الحلّاق
سنين ماشيين ع العلاج..
لا حد فينا مات..
ولا حد فينا خف..
زى الهدوم القديمة..
اللى فى الدولاب..
فوق خالص ف آخر رف..
تسأل علىّ فى العيد..
وأزورك وانت مريض..
بسرعة بسرعة خطف..
وأهى أيام..
يادوب نحافظ ع النظام..
الطويل ورا..
والقصير قدام..
ونعدل الصف..
وطابور يسلمنا لطابور..
والعفاريت مش زى زمان..
بتخاف م النور..
لأ..
ده احنا ممكن ف عز الضهر..
نقع م البلكونة..
أو نتحدف حدف..
عشان كدة بنخاف من بعضنا..
وم الصور والأسامى..
نعمل باب حديد للشقة..
وتوكيل للمحامى..
وعقبال مانقول..
امسك حرامى..
يكون النهر جف..
على فكرة..
التعويرة اللى ف راسي..
دى غلطة الحلّاق..
قلتله خلى عندك ذوق وأخلاق..
راح شالها بالموس وحف..
خلانى أحس بالبرد..
ف عز أغسطس..
ألبس طاقية..
واتكلفت ف ميت بطانية..
واتلف لف..
شوف..
مش مهم راسي..
لكن اللى جرح احساسي..
واحد قليل الأدب..
بص ع التعويرة..
وقال ايه القرف ده وتف..
بس أنا جريت وراه..
وقلتله ورحمة أمى ماهاسيبك..
وصعب علىّ نفسي..
ففضلت أعيّط..
وأضرب كف على كف..
لكن بعد كدة نسيت..
وقبل كدة نسيت..
أصل أنا قلبي أبيض..
ولو مش مصدق..
اقرا حضرتك الملف..

ورد الذرا
26-10-2007, 01:10 AM
قصيدة الأسبوع :rolleyes:

كارت حرّية

بص يا عم..
قبل الماتش مايبتدى..
من حقّك تختار..
ملِك أو كتابة..
ولو ف نص الليل..
حد جرّك من قفاك..
قول له بقلب جامد..
فين إذن النيابة..
وطالما كده كده مسروق..
يبقي ع الأقل تعرف..
مين همّ أفراد العصابة..
انت بس..
اشحن حرّية..
كارت من أبو عشرة..
أو عشرين ..
أو خمسين أو ميّة..
تلاقى قلبك بقي زى الحديد..
وقادر تفُوت من أى بوابة..
وتغنّى للصبح..
وتقول ع الربابة..
بس خلّى بالك..
لو رصيدك خلص..
أو انتهت الصلاحية..
هاتتغير العِيشة..
وهاتعرف إن الدنيا كدابة..
بنت كدابة..
وهاتفتكر كل اللى راح..
وتقول الله يرحمك يامّه..
ويرحمك بقي يابا..
لا هتلاقى عيش وملح..
ولا أصحاب ..
ولا أهل..
ولا قانون..
ولا نقابة..
ساعتها بس هاتعرف تفرّق..
بين العصافير والديابة..
وإن الكلام الحلو..
والغُنا الجميل..
كان مجرد سحابة..
وإنك لسة الواد..
ابن الناس الغلابة..
وإن لسة فيه خوف..
ورصاص..
وعسكر..
ودبّابة..
على فكرة مش دايما..
الأسد الجدع النبيل..
بيبقي هو ملك الغابة..
ياحاج..
هو أنا ممكن ..
يبقي عندى خط حرية..
على مهلك..
وفكر كويس ف السؤال..
قبل ماتقول الإجابة..

مواطن مصري
09-12-2007, 12:49 AM
من أسبوعين تقريباً لقيت جروب على الفيس بوك لمحبى على سلامة واشتركت فيه .. بعدين لقيت ان على سلامة شخصيا عضو فى الجروب ده ..
ضفته فريند وبعتتله رسالة .. المفاجاة انه رد عليها فورا بعد أقل من 10 دقايق! حظى بقى انه كان اونلاين ساعتها :)
بعتتله رسالة تانى ورد عليها برضه :)


نفسى اتفتحت انى أصحى الموضوع ده وأجيب أشعار تانى :)
للعلم: تقريباً الدستور بقى يوميا بيعيد قصايد قديمة ومفيش جديد غير القصيدة الأسبوعية ..










اسمه ايه ده؟!


بالصلاه ع النبي ..
احنا عندنا اسمه ايه ده ..
احسن واحد يحلل مبارايات ..
ويحط التشكيل ..
الاساسي والبديل ..
ويقولك امتى تلعب براسين حربه ..
وامتي تلعب من غير راس ..
ولو ضميرك مش مرتاح ..
وعندك احساس ..
بلاش تشوط ع التلات خشبات ..

وعندنا اسمه ايه ده ..
احسن مهندس خبير ..
بيرمش بس للبير ..
يطلع غاز وبترول ..
وينزل دهب م الحنفيات ..

وعندنا اسمه ايه ده ..
احسن سمكري ف التلاتين سنه الاخيره ..
تخش من مجري العيون علي عين الصيره ..
هاتعرفه من مناخيره ..
ومن شكل العربيات ..

وعندنا اسمه ايه دا ..
مجرم قانون دولي ودستور ..
وايده خفيفه قوي ف التعديلات ..
يشيل من هنا ويحط هنا ..
جواهرجي ياربي ..
ملقاط ..

وعندنا اسمه ايه ده ..
احسن واحد يحط الفول على الطعميه ..
ويعمل سندوتشات ..

وعندنا اسمه ايه ده أحسن دكتور ..
مسالك وعظام وقلب وغرام ..
من نظره عينيك يعرف ..
كل الحاجات ..
ولا روشته ولا ابره ..
ولا تحليل ولا اشاعات ..

وعندنا اسمه ايه ده ..
احسن حانوتي اثار ..
ولا لو جاله برد ..
أبو الهول يموت ..
وتنتحر الاهرامات ..

وعندنا اسمه ايه ده ..
احسن كاتب ..
واحسن مخرج رقص ..
واحسن جزار كوارع وعكاوي وحلويات ..

وعندنا اسمه ايه ده ..
ملوش حل في الزراعه ..
فواكه وحبوب وخضراوات ..
يقول للأرض قمح ..
تقوله حاضر ..
ونخبر ونعمل بسكويت ..
وفينو بسمسم وبقصمات ..

وعندنا اسمه ايه ده ..
صاحب القهوة ..
كلنا نتيتم ونتشرد ..
لو بعد الشر ..
زى الناس ما بتموت ..
مات ..

ياخي أنا مش عارف ..
لما احنا عندنا ..
اسمه ايه ده ..
واسمه ايه ده ..
أمال اسمها إيه دى ..
مصر ..
مبتتقدمش ليه ..
وتعبت ..
وزهقت ..
وداخت ..
ولفت السبع لفات ..



لاحظوا الرمزية الشديدة لهذه القصيدة .. (وعندنا اسمه ايه ده .. صاحب القهوة .. كلنا نتيتم ونتشرد .. لو بعد الشر زى الناس ما بتموت .. مات) :rolleyes: :rolleyes:














مطلوب عروسه




مطلوب عروسه طيبه ..

ومتعلمه ومؤدبه ..
ومؤمنه بالقضاء والقدر ..
سنها من سنى ..
اصغر او أكبر منى ..
مش هنختلف ..
المهم مبتعرفش تطبخ ..
علشان مش هقدر أجيب ..
اي حاجه تنفع للطبيخ ..
وتكون بتحب القراءه ..
وتهوي الرحلات ..
وتعشق السفر ..
مش عضو ف أى حزب ..
وطبعا عارفه ان الكذب حرام ..
بتحب الكوره ..
مهمومه بالدوري العام ..
وملفوفه القوام ..
حلوه وزي القمر ..
شعرها ناعم حرير ..
ملهاش أى مصلحه ..
ف شارع القصر العينى ..
او مجمع التحرير ..
وفاهمه كويس ميدان الجيزه ..
مش متابعه جلسات مجلس الشعب ..
ولا بتسمع البيان الختامى ..
لأى مؤتمر ..
وتكون من عيله ..
بتشتري راجل ..
لاعايزه شبكه ولامهر ..

وأنا بقى ..
خبرة فى المرمطة ..
وجميع اشكال القهر ..
مواطن من انتاج مناهج ..
وزاره التربيه والتعليم ..
ثانويه عامه ..
النظام القديم ..
ايام الارنب الغضبان ..
والخس والجزر ..
وزي النسمه والله ..
يعني تعتبرنى من دلوقتى مش موجود ..
لا حس ولا خبر ..
بس مخي نضيف ..
وعاقل ورزين ..
وعندي شويه نظر ..
ورغم انى ياما اتزحلقت ..
لكن لسه بفرح بالمطر ..
علي فكره ..
أنا حاجز شقه بحرى ..
أربعين متر ..
آخر طريق الواحات ..
بس لسه ما حطوش الاساس ..
علشان تقريبا ..
مش لاقيين الحَجَر ..

مواطن مصري
02-01-2008, 12:55 PM
قصيدة العام الجديد .. رائعة فعلا




كل سنة وانتى

كل سنة و انتى الأميرة ..
و انتى البصر و البصيرة ..
متستغربيش ان لسه
الحرامى حرامى ..
و هى هى الوشوش ..
و الكدب و نفس الأسامى ..
و النفوس الحقيرة
لسه حقيرة ..
متستغربيش
من نفس السؤال ..
و الدهشة و الحيرة ..

عايز أقولك سر ..
ابنى الصغير بيحبك أوى ..
اعملى معروف ..
اوعى تجيبى لحد سيرة ..
ولسه فى ناس بتكتب شعر ..
و بترسم و بتغنى ..
و ف قلوبهم أحلام كبيرة ..

كل سنة و احنا جوانا بقايا م الفرح
و قادرين نضحى ..
كل سنة و انتى غنوة عشق
بتصحى فينا البنى آدمين و بتصحى ..
اوعى يا مصر يهزمك الحزن ..
و تهربى ..
و تقولى زهقت ..
و تتنحى ..
اوعى ..
اعملى معروف ..

high hopes
02-01-2008, 02:55 PM
القميص المِقلم

ساعات..
انا وروحى نتخانق..
ونعلق لبعض المشانق..
وضرب وشد..
حاجة بجد..
تزعل قوى وتضايق..
لحد ما ننزف..
لحد ما ننزف ونضعف..
ونفهم..
ونعرف..
ونحس بنعمة الحب..
ونشكر الخالق..
يارب..
يا خالق القلب طاهر برئ..
ارزقنى نور الطريق..
واكفينى شر اللف والدوران..
والحيرة..
عند المفارق..
نفسى قوى فى ساعة رضا..
تعبنا يا قلبى م الجرى..
كفاية كده..
سهل السؤال..
لكنه صعب وتقيل..
صحيح مفيش حل.. لكن كمان..
مفيش بديل..
عايز اشترى دماغى..
وزى ما تميل أميل..
أقول للحلاق ..خف الجِناب..
وخلّى قدام طويل..
وأطّلع البنطلون الجينز..
والقميص المِقلم..
وأشرب بدل الشاى..
قرفة بالجنزبيل..
وأتمشى عالكورنيش..
يمكن عيونى ..
تقدر تشوف النيل..
كان عندى اصحاب ف المدرسة..
والجيش..
صلاح ويوسف..
مصطفى ونبيل..
لكن لما اتصلت بصلاح..
وقالولى عقبال أمالتك..
ده راح وعايش ومتجوز..
ومبسوط فى اسرائيل..
ساعتها بس حسيت..
إن الحِمل لسه تقيل..
رميت البنطلون الجينز..
والقميص المِقلم..
ورجعت من تانى..
انا وروحى نتخانق..


* شكرا يا محمد فكرتنى بالموضوع..
عندى قصايد تانية شايلاها هنشرها تباعا ان شاء الله..

مواطن مصري
28-01-2008, 06:45 PM
يا شيخ اسكت

قلتلك اسمع كلامى ..
ده نصاب ..
وده حرامى ..
وده قاتل ..
وده لئيم ..

قلتلك ممَعَناش
غير سِتة جنيه ..
وما عملناش
غير تلات كبارى
من غير لا صحة ولا تعليم ..

وقلتلك ده ضلالي ..
ف عز الضهر
ياكل مال اليتيم ..

قلتلي انت مش كويس؟
وعيالك تمام وف السليم؟
يا عم سامح ..
ده المسامح كريم ..
واحمد ربنا ..

يا شيخ اسكت ..

يا عم ..
مانا باحمد ربنا ..
احنا بس عايزين ..
حد يقولنا ..
الدور حاييجى علينا ونفرح؟
واللا صالة الأفراح ..
كاملة العدد ..
ومافيهاش مطرح؟

يا شيخ اسكت ..

دانا من كتر ما كتبت وجع ..
اتهيألي إن الفرح عيب ..
أو ممنوع!

عارف لو نسيت ..
وكتبت قصيدة حب؟
أحس إنى عملت عمل ..
وأقول يا فضيحتى ..

ولو دق الباب ..
أجري واخبي قلبى ..
أحسن يكون بوليس الآداب ..
ويلفوني ف ملاية ..
ويعملولي قضية زنا ..
يا عم مانا باحمد ربنا ..
باقولك مافيش جوانا شىء ..
ولا عندنا..

يا شيخ اسكت ..

دانا باقول لمراتي ..
تعالي نرجع لايام زمان ..
قالتلي ياخويا العيال أولى ..
فاضل علينا ..
من مصاريف المدرسة قسطين ..
شوفت احنا بقينا فين؟!

يا شيخ اسكت

وفضلت اقول يا شيخ اسكت ..
يا شيخ اسكت ..
أتاريني باكلم روحى ..
ولا فيه شيخ ..
ولا قسيس ..
وتقريبا لما انفعلت ..
وقع الرز م الكيس ..
واتبعترت ع الأرض كل الحاجات ..
ولِم بقى يا معلم ..

عاجبك كدة؟
يا شيخ اسكت!

مواطن مصري
30-01-2008, 07:59 AM
سبيل أم عباس


بقولها ما تيجى ..
نحط سيناريو للاحداث ..
قالتلي يا عم ..
اللي هايسرى علينا ..
هايسرى على الناس ..

قولتلها ..
يعنى لو مفيش ميه؟
قالتى ..
يبقى سبيل أم عباس ..

قولتلها ..
ولو مفيش عيش؟
قالتلى ..
يبقى رز و قلقاس ..

قولتلها ..
ولو مفيش غاز؟
قالتلى ..
نسيت الوابور أبو فونيه
وطربوش و كباس ..

قولتلها ..
ولو مفيش نور؟
قالتلي يبقى أحسن ..
عشان ما تشفش البنات
اللي ف الدش ..
يا راجل يا بصباص ..

قولتلها ..
ولو مفيش بيت؟
قالتلى ..
نبقى نقعد عند أمى
بقى و خلاص ..

قولتلها ..
ولو فيه قلق؟
قالتلى ..
كوباية شاى ..
تظبط المزاج و تعدل الراس ..

قولتلها ..
ولو فيه خوف؟
قالتلى ..
نقفل علينا الباب ..
بالقفل و الترباس ..

قولتلها ..
ولو مفيش هوا؟
قالتلى ..
أهوي عليك بالجورنال ..
و تهوي عليا بالكراس ..

قولتلها ..
و لو مفيش أمل؟
قالتلى ..
يالاهوى!!
حرام عليك ..
يا ساتر يا رب ..
ما احنا أهو ..
من غير قلب ..
ومن غير احساس ..
وعايشين!
عاجبك كده؟!
أهو النور قطع ..
و مش شايفين ..
حاسب تدوس ع الواد ..
و اوعى تكسر طبق ..
وللا كوبايه ..
وللا كاس ..

مواطن مصري
08-02-2008, 08:08 PM
القصيدة دى حبيتها جدا .. تحفة :



يعنى نطفش ؟؟

ياعم هو إحنا بنزيد
ولا بننقص؟!
تقولى كل سنة وأنت طيب فى العيد ..
وأقولك يرحمكم لله
لما تعطس ..
واشوف وشك بخير ..
ومتعرفش فين بنروح ..
ونغيب ونغطس ..
تسكن فى شقة بحرى
تكييف مركزى
وتحس برضة انك بتفطس ..
وكل شيىء بيزيد ..
وأنت بس اللى بترخص ..
ويوم نحاول ..
وألف نيأس ..
يعنى اية؟!
يعنى نطفش؟!
مش هنطفش ..
يعنى نخرس؟!
مش هنخرس ..
إحنا مهما نجوع ونعطش ..
بس عمر النيل ما يخلص ..
مش هنخرس ..
مش هنخرس ..

مواطن مصري
10-02-2008, 02:57 PM
اللهم اجعله خير

نفسي اتمطع ..
أنزل أطلع ..
أحلق أقرع ..
و أتشجع و أقلع
كل هدومى القديمه ..
و أرمى الحاجات اللئيمه ..
و أبقى حر كده ..
زي الطير ..
نفسى اضحك من قلبى ..
من غير ما اخاف
و أقول اللهم اجعله خير ..
يا أخي نفسى مره ..
اغير خط السير ..
يعني مش زى ما رُوحت ..
لازم أرجع ..
نفسي أفرح بضحكتَك ..
من غير ما أخطفها منك ..
أو أحسدك ..
أو أطمع ..
نفسي أبص م الشباك براحتى ..
و أقول الله ..
يا بَختى!
نفسى أحس من تانى بالجمال ..
يا سبحان من أبدع ..
نفسي يبقى ليا لازمه ..
ف وقت الحزن
و الأزمه ..
تلاقيني بابْنِى ..
بصَّلح ..
بغَّير ..
بحلم ..
يعني انفع ..
نفسي ده يحصل
قبل كل شيء جوايا
ما يعجز ..
أو يودع ..
نفسى أحب من تانى النهار
و العمار ..
يعني باختصار ..
نفسي ارجع تانى
بنى آدم ..
تفتكر ده ممكن ..؟
و أنا لا بشوف
و لا بسمع ..!!



قصيدة روعة .. معانيها جميله جدا :)

مواطن مصري
18-02-2008, 08:13 PM
تقاسيم ع العود

لما كنت شاعر..
كان كل الغُنا حزين
ولما بقيت عصفور..
كتروا الصيادين
ويوم ما قابلت قلبي..
ماعْرِفش انا ابقى مين
طب اعمل إيه..
إيه إيه؟

لما كنت حلو..
ماكانش عندي كاميرا
وقُلت قشطة يا ابيض..
حبتني واحدة سمرة
وكل مانوي افوق..
بترخص الخَمرة
طب اعمل إيه..
إيه إيه؟

لما كنت أسد..
ماكانش فيه غابة
ولما بقيت مفتري..
مابقاش فيه غلابة
وعلى ما اكتشفت النبلة..
كانوا اخترعوا الدبابة
طب اعمل إيه..
إيه إيه؟

على ما افتكرت اني حر..
كان كل البلد عساكر أمن
وقلت اعمل كحك العيد..
لا لقيت دقيق ولا سمن
ولما بطلت احب..
حبيبي رَق وحَن
طب اعمل إيه..
إيه إيه؟

على ما فكَّرت ابني بيت..
كانوا باعوا الأراضي
ويوم ما اندبحْت..
لا لقيت قانون ولا قاضي
واصرخ واقول بنغرق..
الناس تقولّي عادي
طب اعمل إيه..
إيه إيه؟

لما كنت قط..
ماكانش فيه فيران
ولما كنت حرامي..
كان كل البلد جدعان
وعلى ما افتكرت اني مصري...
كان بقى إللي كان
وانا أعمل إيه؟

*أنس*
06-03-2008, 10:35 PM
بسم الله الرحمن الرحيم
الشاعر على سلامة أصبحت قصائده تنشر فى المصرى اليوم بدلا من الدستور

مواطن مصري
07-03-2008, 05:43 AM
بالفعل لسبب ما ترك على سلامة الدستور وتوقف لفترة عن الكتابة فى الصحافة ..
ما فهمته ان للامر علاقة بعمله فى شركة بترول أو شىء من هذا القبيل ..
لا أعتقد أنه يوجد أى مشاكل أو توتر فى علاقته بأسرة الدستور بل بالعكس كانت قصيدة وداعه للدستور يبدو فيها بشدة التقدير لها، وأيضا عندما سُئل فى جروب على الفيس بوك عن متى سيعود للكتابة فى الصحافة قال:
((مع كل تقديري وحبي وإحترامي لجريدة الدستور والقارئ الحبيب ... لكن كل شبر ف مصر هو بيتي وقلوبكم بيتي وأشعاري هي ملك كل الناس الطيبة ...
وقريب جدا ها نتقابل تاني مش مهم فين لكن طبعا ف مصر....))
ده كان كلامه فى 17 فبرير وفعلا عاد للقراء منذ أول مارس ولكن هذه المرة فى المصرى اليوم ..

على كل حال وأيا كانت الأسباب فما يهمنا كقراء هو وجود قصائده ومش مهم فين :)



دى كانت آخر قصيدة نشرها فى الدستور فيما يشبه الوداع:




حضن كبير

إلى أستاذى العزيز
إبراهيم عيسى
اللى أهدانى بلكونة بحرى
بمساحة الوطن
أطل منها على الناس
للقارئ الحبيب
اللى كتب شهادة ميلادى
لكل أولادى
وأسرة التحرير
حضن كبير
بقلب
وبذمة
وبضمير ..

علمتنى أمى
معنى العيش والملح
ولاننا بنتألم
من نفس الجرح
يبقى مش هتفرق كتير ..
على أى حال
طول عمرها الدنيا
يا صاحبى
بألف حال ..
صحيح اللقا جميل
لكن ايه المانع كمان
يبقى الفراق آخر جمال ..
وبعدين احنا هنروح
من بعض فين
واليمين زى الشمال ..
اكيد هنتقابل
ف ميدان الجيزة
ف شارع عبدالعزيز
أو جوه كتاب القراءة
بنفس الحيرة
ونفس السؤال ..
جايز أشوفك ع الرصيف
وسط موظفين الضرايب
وجايز تشوفنى ف قلب الحبايب
ف المحلة
وسط العمال ..
اكيد هنتقابل
واحنا بنحلم للوطن
ولما يهل الفجر من تانى
وتقول ده رزق العيال ..
لكن لا يمكن هنتقابل
على ضهر مركب هربانة من مصر
مهما ساءت الأحوال ..
على فكرة
أنا عايز أبكى
وماسك نفسى
بس برضه فيه احتمال ..
تهرب ن قلبى دمعة
لا تعرف توصفها قصيدة
ولا غنوة
ولا موال ..

مواطن مصري
07-03-2008, 05:51 AM
من القصائد النشورة فى المصرى اليوم:




البدلة الكحلى

حد فاكر عيد الاستقلال..
يا عم ده أنا بغلط..
ف أسامي العيال..
ما بقتش شايف من ملامحهم..
غير الكتب والكراريس..
ودرجات آخر السنة..
وإنتي وأنا..
مش باقي مننا..
غير فستان الفرح..
والبدلة الكحلي الضيقة..
اللي زحمين الدولاب ع الفاضي..
وصورة عروسة وعريس..
نفسي آخد بعضي علي جنب..
وأسأل روحي كام سؤال..
ولا أقولك..
خليها بقي ليوم الخميس..






أول يمين

ساعات أحس إني أخرس..
بتكلم مع حد..
مش فاهم لغة الإشارة..
أقوله قلبي تعبان..
يا عم بلاش دخان..
يعزم علي بسيجارة..
أقوله ما تعرفش مصر فين..
يقولي فيه فطاطري كويس..
أول يمين بعد الإشارة..
أقوله أنا فرحان أوي..
يقولي بس لو قربت شوية..
ده لسه القطر طالع..
يا خسارة..
تصدق..
سنين بدور علي صاحبي..
وهو ساكن جنبي..
ف الشقة اللي قصادي..
ف نفس الدور..
ف نفس العمارة..

مواطن مصري
09-03-2008, 08:57 PM
إنذار على يد محضر

لكل راجل وست..
وبنت وولد..
ولكل حد إتولد..
ف حضنها وعاش..
صغير كبير..
صاحب مقام..
أو صاحب محل عصير..
ف الخدمة لسه..
أو حتى ع المعاش..
لكل اللى بص ف عيونها..
لكنه معرفهاش..
لكل اللى سرق..
واللى حرق..
واللى احتكر..
واللى عمره ما افتكر..
لكل اللى لوث دمها..
واللى باع..
من غير ما ياخد رأيها..
واللى سكت ونام..
مع انه بيحبها..
ولكل اللى داس على قلبها..
ولما قالت آه ..
اشترى دماغه..
وكأنه ماسمعهاش..
إنذار من مصر..
على يد محضر..
بصراحة كلكم على بعضكم ..
ماتلزموهاش..
بقولك ايه..
اشمعنى مصر بتبقى جميلة..
ورقيقة وغالية..
واحنا نايمين..
ولما نصحى تانى ..
ونملاها بالحزن والدخان..
كل شىء بيرجع تانى زى ماكان..
رخيص أوى..
وساعات ببلاش..









مفيش كوكو

أخر كلام يا عم..
طعام..
يعني مم..
يعني علي سبيل المثال..
سندويتشات..
وأرجوكو..
ماحدش يجيب سيرة الكوكو..
قدام العيال..
وكوكو للي مش عارف..
يعني دجاج..
يعني شوربة..
يعني زَفر..
معقول ده محتاج
عقد عمل ..
وغربة..
وسفر ؟!
عارف..
لسه شوارعنا بتخاف من المطر..
ومطر للي مش عارف..
يعني خير..
إزاي ف بلدنا الخير..
أصبح خطر..




ايوه يا على .. (إزاى فى بلدنا الخير أصبح خطر) :(:(:mad::mad:

مواطن مصري
12-03-2008, 02:51 AM
البيانو

جربت تتعشى
على أنغام البيانو
وضوء الشموع ..
جربت تتكلم مع قلبك
ولو الكلام مش عجبك
تغير الموضوع ..
جربت تسافر لوحدك
وترجع لوحدك ..
جربت تبكى
من غير دموع ..
جربت تأجل أفراحك
وسألت نفسك
ليه بنعمل للميت أربعين
وللمولود سبوع؟
جربت تجرى ورا الاتوبيس ..
أو تجرى م الاتوبيس؟
جربت تقف فى طابور
ولما تيجى تحلم
ألف حاجة تقولك ممنوع ..
جربت الاحساس
إنه ليل نهار عندك وسواس
إن قميصك مكرمش
وفيه زرار ملخلخ
والبنطلون مقطوع ..
جربت تقول لحد بحبك
عشان بس تكسب ثواب ..
جربت تاكل من غير نفس
حتى لو كان كباب
وانت ميت م الجوع ..

عارف ..
حلوة أوى ضحكتك ..
لكنها بتكشفك ..
وتقول إنك موجوع ..

مواطن مصري
22-03-2008, 03:38 PM
تقريباً

ولسه هاتشوف وتتفرج..
يا ابن آدم..
طول ما انت عايش..
مش عارف عندي إحساس..
إن مصر حد شّمْمها حاجة ف المولد..
وسرق منها الغوايش..
واداها صرة مربوطة..
لما فاقت وفتحتها..
لاقتنا..
بجد بجد..
يا حلاوتنا..
نُصنا بيدّور
علي علاج للحموضة..
والنُص التاني..
شوية حاجات..
مش موجودة..
عموما أنا عملت محضر ف القسم..
تاخد رقمه..؟!











صفارة الحكم

دي مصر..
اللي كانت ف الأصل وردة..
وأنا الطفل العجوز..
ابن امبارح والنهارده..
أنا المواطن آخر دلع..
اللي من كتر ما شرب وبلع..
مابقاش عارف يفرق..
بين السخنة والباردة..
اداني القانون..
حق الكلام والبكا..
والتمثيل المشرف..
جوه المعارضة..
من حقي ألعب وأجري..
وأشوط ع الجون..
لكن ديماً..
تهزمني صفارة الحكم..
وتلعب ضدي الأرض..
وتقف قصادي العارضة..

مواطن مصري
24-03-2008, 05:41 AM
الطريق الدائرى


جميل منظر النيل
من ع الدائري..
والنسمة اللي بتقدر تفوت..
سرقة كده من وسط البيوت..
بس يا ريت بقى..
حد يلحق الشجرة الكبيرة..
قبل ما تدبل وتقع وتموت..
أسند علي سور الكوبري الحديد..
وأحلم وأسرح بعيد..
يصحيني صوت عربيات شايلة كراتين..
أغني هلت بشاير الدعم..
يا حلاوة بطاقة التموين..
بس من إمتي السكر والسمن..
بيمشوا ف حراسة الأمن..
وتحت عيون المخبرين..
قلت يا واد
اقطع الشك باليقين..
سألت واحد م السواقين..
سكر ده يا حاج..
قاللي ده مر متعبي ف شوية قوانين..
قلت خير برضه..
يمكن عشان نحارب الفقر والجهل..
ويرجع تاني يطلع الفرح سهل..
م القلب الحزين..
أو يمكن عشان الاحتكار..
وحدوتة الأسعار..
والتجار الطماعين..
أو يمكن عشان الصحة والتعليم..
والطفل اليتيم..
وحقوق المعاق قبل السليم..
أخيراً بقينا بني آدمين..
لكن لما سمعت صوت بيقول..
إنت ياض يا اللي هناك..
يا زفت الطين..
عرفت إن ده كله عشان نخاف..
ونخاف ونخاف..
أكتر ما إحنا خايفين..!

مواطن مصري
26-03-2008, 05:23 AM
بيض بالبسطرمة

حبيتها أيام ما كان..
شارع القصر العيني اتجاهين..
كان أياميها ممكن جدًا..
نتعشي بيض بالبسطرمة..
ونشرب شاي بنعناع ف الحسين..
كان لسه رمسيس ف الميدان..
والدنيا أمان ولذيذة..
وكان فيه أهرامات ف الجيزة..
اللي بعد كده اسم الله عليك..
اتبني مطرحها سيرك أبوعزيزة..
ماكنش لسه مترو الأنفاق..
وكنا بنرفض..
أي معني للفراق..
وكان فيه حب من نظرة عين..
تصدق بقي..
كانت البيوت فيها بَركة..
رغم المساحات الضيقة..
وكان فيه شوية حاجات جميلة..
ما تعرفش راحت فين..














تحت الشجرة

إنت يا عم..
يا أخ..
يا اللي هناك ف الصورة..
ماينفعش تسلم قفاك لحد..
وبعدين تطلب منه فاتورة..
خليك منطقي وحنين..
أنا مثلا..
من وأنا آد كده..
بحلق تحت الشجرة..
عند عم زكريا المزين..
راجل مذاكر دماغي كويس..
وأنا أصل دماغي..
مفتوحة م الناحيتين زي الماسورة..
حاسب بس من الكرسي..
أحسن رجليه مكسورة..
سلامتك يا راجل يا طيب..

مواطن مصري
28-03-2008, 01:25 AM
القصيدة التى نشرت بالامس فى المصرى اليوم وتعتبر الجزء الثانى من على باب السفارة (http://www.rewayat.net/forum/showpost.php?p=534664&postcount=6)



علي باب المطار

علي باب المطار ..
لمحت إبليس وف عيونه شرار ..
بقوله مالك؟
قاللي بفكر ف الانتحار ..
بتتكلم بجد؟
قاللي ودي فيها هزار ..
قلتله وإيه اللي جابك؟
قاللي هو أنا كنت عايز ..
بس تقريبا ..
جهاز الوسوسة عندي بايظ ..
محتاج دروس تقوية ف الفساد ..
متعرفش مدرس كويس وحياة أبوك ..
أنا ورايا بيت ومصاريف وولاد ..
تصور بقولهم هناك زوروا الانتخابات ..

وهيصوا وبيعوا كل الحاجات ..
قالولي دي بلدنا ..
إنت أهبل ياض..؟!
دول حافظين نشيد بلادي بلادي
أكتر منكم ..!
يخرب بيتكم ..!
مابقيتش نافع شيطان ..
يا راجل ده أنا بفكر أتوب ..
وأعمل تواشيح ف رمضان ..!
حرام عليكم ....

مواطن مصري
05-04-2008, 08:52 AM
تحت الشجرة

إنت يا عم..
يا أخ..
يا اللي هناك ف الصورة..
ماينفعش تسلم قفاك لحد..
وبعدين تطلب منه فاتورة..
خليك منطقي وحنين..
أنا مثلا..
من وأنا آد كده..
بحلق تحت الشجرة..
عند عم زكريا المزين..
راجل مذاكر دماغي كويس..
وأنا أصل دماغي..
مفتوحة م الناحيتين زي الماسورة..
حاسب بس من الكرسي..
أحسن رجليه مكسورة..
سلامتك يا راجل يا طيب..















طوابير وفواتير

طوابير وفواتير ..
وحاجات تانية كتير..
ده المشهد..
وده المسرح..
ودول بقى الجماهير ..
المهم..
كل يوم وأنا راجع م الشغل ..
أعدى ع الست العجوزة..
بتاعة الجرجير..
أميل آخد حزمتين..
لعل وعسى..
أعرف أنا مين وفين ..
وربنا يكرمنى ويتحسن الاداء ..
ويتظبط التفكير ..
الحقيقة البعد الانسانى ف الموضوع ..
كبير كبير..
بس مكسوف اقول للست العجوزة ..
فين الدفاتر..
ولا انت رأيك ايه يا معلم؟
بقولك إيه ..
هو الربيع مابيعديش على بلدنا؟!
معقول السنة كلها أمشير؟!
سلامتك يا طيب ..

مواطن مصري
09-04-2008, 09:03 AM
قراقيش

حكومة رقيقة أوي وشيك ..
بتقفل كل البيبان والشبابيك ..
عشان بتخاف علينا م البرد ..
لأ إحساس مرهف بجد ..
الأسمنت والحديد يغلي ..
تقوم تبيع الأرض ..!
هو ده الفكر الجديد
اللي بيبني المجد ..
وشوف الحنان والطيبة والإنسانية..
سعر تصدير الغاز
أقل من سعر الفول والطعمية..
ده علي اعتبار إن الناس لبعضيها..
والدنيا منفاتة..
وإحنا والحمد لله..
مش محتاجين أنابيب..
والمشتري مش غريب..
جربت الشاي بالحليب
ساعة الصبحية ..؟
قراقيش بقي وسقي يا معلم
وانسي القضية..
ده تقريباً ماحدش شايف حد ..!

مواطن مصري
09-04-2008, 09:31 AM
مجموعة (هل تسمعنى) ... رائعة :)



هل تسمعنى ١

ألو ألو..
هل تسمعنى؟
بكلم حضرتك من قدام
فرن الحاج أبوصلاح..
كله سعادتك تمام..
والشعب مستمر ف الكفاح..
لا يا فندم مفيش قلق..
شوية كسور وكدمات..
واللي مات مات..
واللي راح راح..
الحمد لله زي الفل..
ويا رب دايماً
من نجاح لنجاح..!
معايا يا فندم ..
ورحمة أمي مبسوط ومرتاح..
كله من خير سعادتك..
إحنا بس محتاجين خميرة بيرة..
لأ يا فندم.. بيرة إيه ..!
أستغفر الله..
هو أنا بتاع كده ؟!
كلم حضرتك بعدين بقى
عشان تقريباً الكارت خلص..









هل تسمعنى 2



ألو ألو..
هل تسمعنى؟
بكلم معاليك
من محطة أبوغريب..
هو يا فندم القطر
اللي لا بيودي ولا بيجيب..
العتمة الكتمة..
الزحمة الكئيب..
الشعب؟
ماله الشعب..؟!
فرحان وإحساسه عالي..
وكل الحالات بتستجيب..
معانا يا فندم
أجزخانة لكل مواطن وطبيب..
مرهم للحروق؟
ورحمة أمي بعت أجيب..!
طب يا فندم عشان القطر اتحرك..
الموت علينا حق يا فندم..
واللقا نصيب..










هل تسمعنى 3

ألو ألو ..
هل تسمعنى؟
بكلم جنابك من عزبة شحات العريان ..
دى حتة كدة يا فندم
بعيدة عن العين ..
لكن قريبة من حلوان ..
مفيش ميه يا فندم
لكن مفيش حد عطشان ..!!
نور ؟
ملوش لزوم النور ..
كفاية الاحساس بالامان ..!
أنا ورحمة أمي زي الفل ..
مناخيرى ؟
لا .. ده دور برد من زمان ..
الشعب ؟
مبسوط وبيغني وفرحان ..
ما هى مصر حضرتك
امبارح كسبت السودان ..
طيب يا فندم ..
عشان تقريبا البيت بيقع ..
لا اله الا الله ..!








هل تسمعنى 4

ألو ألو ..
هل تسمعنى؟
بكلم معاليك م المستشفى ..
آه والله العظيم ..
تصور ..
كبد البلد سليم ..!
ووشها منور ..!
قطن وشاش؟
لأ يا فندم ما يلزمناش ..
ده الشعب كله متعور ..!
دكاترة؟
أشعة؟
تحاليل؟
ده ترف يا فندم ..!
أوامر سعادتك ..
ورحمة أمي هادور ..
رسم قلب؟
عارفة يا فندم ..
بتاع طويل كده ومدور ..
بعد إذن حضرتك يا فندم ..
جالي كرشة نفس ..
تقريبًا بموت ..
الدوام لله يا فندم ..!








هل تسمعنى 5

ألو ألو..
أوطي صوت التليفزيون إزاي يا فندم..؟!
ده أنا بتكلم من سوق الخضار..
طول عمرها القوطة مجنونة سعادتك..
بس الجديد بقي الخيار..
والبطاطس..
هايصة خالص..
عشان الزيت أسعاره نار..
والكوسة شكلها يفرح..
ماشفتهاش أبدا كده..
والشمس طالعة..
وف عز النهار..
المواطن؟
نفس الابتسامة العريضة حضرتك..
هيموت م الفرح..
خصوصا بعد ما سمع..
عن علاج البواسير بدون جراحة..
إمبارح ف نشرة الأخبار..
المشكلة أنا يا فندم..
من يومين كده..
ابتدي يلعب ف عبى..
ييجي مليون فار..!

مواطن مصري
09-04-2008, 09:49 AM
هل تسمعنى 6

إيوه يا فندم..
بكلم سعادتك م الاستاد..
عارف يا فندم إن المباراة مذاعة..
بس قلت أشيل علم..
وأفسح الولاد والجماعة..
أنا أهلاوي يا فندم..
ورحمة أمي عن قناعة..
الأهلي حضرتك
مش إجوان بحرفنة وشجاعة..
الأهلي رغيف العيش..
أنبوبة البوتاجاز..
والسد العالي..
اللي بيحمي مصر من المجاعة..
هو البطل..
هو عم توفيق التمرجي..
اللي بيدي حقنة ف العضل..
ينام الألم كام ساعة..
مصدر الفرح الوحيد للشعب..
والزمالك أكيد..
مقدر الظرف الصعب..
تصور الموقف يا فندم..
لو الأهلي ماعندوش قلب..
أو بعد الشر بعد الشر..
اللاعيبة عضهم ف رجليهم كلب..
وراح الدوري والكاس..
قوللي بقي سعادتك..
هاتفرح بإيه الناس..
طبعًا الزمالك..
هايعمل م القصيدة دي شماعة..
وكل مرة يتغلب ستة..
وهات م الشبكة يا معلم..
طب يا فندم
أكلمك بعد الماتش..









هل تسمعنى 7

آلو آلو..
عقبال أولادك يا فندم..
بكلم سعادتك من فرح هاي هاي..
ف فندق خمس نجوم..
لأ ورحمة أمي..
أنا مش معزوم..
ولا قريب العروسة..
ولا من طرف المرحوم..
أنا جاي مع ابن خالتي..
شاب زي الورد..
بيشتغل ف الأمن
وخريج علوم..
رقاصة..؟
فيه سعادتك..
بس مؤدبة يا فندم..
وبترقص وهي لابسة الهدوم..
فيه سعادتك حلويات..
وعيش طرى..
وبتاع كده بشنبات
بيقولوا عليه جمبري..
ينقطع لسان الكداب المفتري
اللي يقول علينا شعب جعان..
أو مش لاقي ياكل..
أو محروم..
طب يا فندم سعادتك سهران شوية..؟!
عشان بس البوفيه خلاص..
والناس إبتدت تقوم..









هل تسمعنى 8

آلو آلو..
أيوه سعادتك..
معاك يا فندم..
أنا أصلي بتكلم م الميكروباص..
زي الفل ورايقة وحلوة الناس..
يا فندم انت اللي سعادتك بقيت حساس..
هي إيه العبارة..
دي معاليك مش زحمة..
ده ونس..!
دي تقريباً مصر كلها..
واقفة ف الإشارة..
يا فندم قلنا كتير..
كل مواطن قبل ما ينزل م البيت..
يصلي صلاة استخارة..
المواطن..؟
أهو بيضحك قدامي أهوه..
وزي الفل ومبسوط..
ما هو لما يموت..
في ميكروباص ع الكورنيش..
أشيك بكتير برضه
من الغرق في عبارة..!
لأ يا فندم مش أنا اللي بصوت..
دي المدام
اللي قاعدة قدام تقريباً بتولد..
الله أكبر يا فندم هلت البشارة..
طول عمرك يا مصر ولادة..
وتاريخ..
ومجد..
وحضارة..
بعد إذن سعادتك..
الآنسة اللي جنبي يا فندم..
تقريباً بتحبني..
آه ورحمة أمي..
كل شوية تقوللي..
دمك خفيف شربات..
يا اسمك إيه..
يا واد انت..
يا سمارة..
مع إني أبيض يا فندم..
بس هانعديها سعادتك..!










هل تسمعنى 9

ألو ألو..
بكلم جنابك
من هيئة الأرصاد..
حالة من الطراوة سعادتك
بتسود البلاد..
حر ؟
بعد الشر يا فندم..
ورحمة أمي دي موجة..
بس جت بدري شوية ..
قبل المعاد..
يا فندم الجو لطيف..
ومن بكرة هانلبس خفيف..
صافي يا فندم صافي..
بس الرؤية معدومة..
إحنا كده يا فندم..
أي حاجة نقول الحكومة..
المواطن؟
اسكت اسكت..
اتعلم الشقاوة..
وبيعمل إضراب..
وبيتكلم عن الفساد..
وبيقول كفاية..
ألو ألو..
أيوه يا فندم..
إنت معايا..؟
ألو..
يا نهار أسود..
ده الموبايل فاصل..
هو أنا كل ده بكلم نفسي..
يللا بقى كل شىء نصيب..

high hopes
10-07-2008, 02:02 PM
وإحنا لسه في إبتدائي..
وسط أوراقى القديمة
اللى لسه منها باقى
شوفت صورتى بين زمايلى
و أحنا لسه فى إبتدائي..
الوشوش كانت بسيطة
طاهرة لكن مش عبيطة
نرسم الأحلام خريطة
فى قلبها نقطة تلاقي..
هو صاحبى
لما كان فى الدنيا صاحب..
أما دول كانوا من جيرانى
كل واحد فينا حقق
جزء من بعض الأمانى..
أما دى الشاطرة البليدة
العنيدة أم الضفاير
تبقى حبى الأولان..
قد إيه حزنت عليها
لما راحت فصل تانى..
ما أحنا كنا تخته واحده
فى تانيه تالت
مره قلت
و هى قالت..
لما مدت أيدها شالت
دمعة وقعت غصب عنى
جوه كراسة الحساب..
كنا لسه صفحه بيضه فى الكتاب..
الوشوش كانت بسيطه
طاهرة لكن مش عبيطه
نرسم الأحلام خريطة
فى قلبها نقطة تلاقى
وأحنا لسه فى أبتدائي..

high hopes
10-07-2008, 04:46 PM
صالة السفر


من كتر م الحزن بقي
ف دمنا..
واكلنا..
وشربنا....
حتي في غُنانا..
والسهر..
بقت بتتساوي الحاجات..
صالة الوصول ..
تشبه تمام صالة السفر..
ننادي ع القبح نقوله..
يا عسل..
يا سكر انت يا قمر..
والموت بقي
مجرد خبر..
تصدق..
ساعات بخاف
لو قلبي دق
ما انا كنت قربت خلاص..
اقول عليه حته حجر....
عارف..
رغم احتياجي للفرح..
لكني بتلخبط اوي ...
لو دق بابي بدون سبب..
وبدون شروط...
أبقي نفسي أعيش كمان ..
مليون سنة...
و اقول يا ريت...
دلوقتي اموت....
معقول بقيت..
بخاف كمان من الفرح..
و م الأمل..
و م الهدوء ...
واقلق و أقول ...
يا هل تري ايه مستخبي
وايه اللي جاي ..
بعد السكوت.
عارف..
لو كل الحاجات الحلوة..
كان مسوح لها
وتقدر تفوت
لو كان حقيقي ده وطن.
مش مجرد مساحة ع الخريطة..
وناس..
وزحمة ..
وشوية بيوت..
عمري ما كنت يوم..
اخاف م الفرح....
لو دق بابي..

high hopes
12-07-2008, 02:11 PM
وش مرمطة


تصدقى بقى ..
أن احنا وش مرمطة
نيجى نرسم الفرح
يطلع شوية شخبطة
لايق علينا الحزن
والقوانين
والمسئولين
لايق علينا الكدب
والكدابين
نقوم م النوم بردانين
منعرفش مين
سرق من مين الغطا
احلام كتير
في الهوا متشعبطة
حقيقى
احنا وش مرمطة
لايق علينا التغير
والتزوير
ومجمع التحرير
وشكل الميكروباص
وميدان الرماية
كأن الحكاية بالمقاس متظبطة
ليه يا حبيبتى
كل ما ابص ف عينيكى
احس كأنك لسه معيطة ؟؟





نفسى اشوفك


اللى باقى من ملامحى
لون عيونك
شعرى الابيض
زى احزانى وراثة
والنهاردة نفسى اشوفك..
لو تعيط
لو تشخبط فوق حيطانى
لو تبقعلى هدومى
تبتسم دمعة همومى..
ليل نهار احسب في سنك
نفسى تكبر تبقى طولى
وتبقى نورى وابقى ضلك
نفسى اسمع صوتى منك..
بس اوعى
تبقى غازى وانتهازى
ولا طوبة طايشة
بتكسر ازازى
اوعى..
اوعى تبقى زى ابوك
والامانى الضايعة منه يغربوك
يجلدوك..
يطحنوك..
اوعى مرة يغربوك..
والنهاردة ..
نفسى اشوفك..

high hopes
13-07-2008, 12:22 PM
بدون سبب


ساعات كده
تقفل معايا
من كل الجهات..
كأنى عصفور بيتخنق
امد ايدى
اطفى المكيفات
وارمى المسكنات
وافتح للضى شبابيكى
واقوله هات..
واشتاق..
لنسمة هوا بكر
لحلقة ذكر
ولحضن امى
اللى مات م الفكر..
وصاحبى
اللى من شوية فات
من غير ماياخد باله
كده..
بدون سبب..





ميدان العتبة


لما أنا والسرير بنتخاصم..
لا يمكن أرتاح ع الكنبة..
ولا ع الكرسي ولا ع الأرض..
ولما يومي بيبتدي..
من ميدان العتبة..
بعرف أد إيه يا حبيبتي..
إحنا لسه بعاد عن بعض..
ولما العلاج يبقي كله مسكنات..
بتتساوي كل الأوجاع..
الصداع..
زي المرارة..
وسرطان..
زي نزلة البرد..
المهم..
يوم التلات اللي فات..
كان يوم حافل..
طول النهار بلف..
علي كالون ست تكات..
روحي ضايعة..
وقلبي قافل..
قالتلي بحبك..
قلتلها مش سامع..
قالتلي وحشتني..
قلتلها مش شايف..
قالتلي إنت سافل..
سكت ومشيت..
زي ما بتمشي كل المسائل
تسرقني من تاني..
نفس الحاجات..
وكل ما حس بالألم..
أقول لقلبي تستاهل..
آد إيه يا حبيبتي عيونك..
جميلة أوي وصافية..
لكن ميدان العتبة..
دايما يفكرني..
إني لسه..
في العشق جاهل..

high hopes
16-07-2008, 12:53 PM
هل تسمعني - 12


آلو آلو
هل تسمعني؟
لأ يا فندم أنا مريح شوية..
بكلم سعادتك م البيت..
حماتك بتحبك يا فندم..
بسم الله سعادتك معانا..
طب سندوتش صغير..
يعني ورحمة أمك إتغديت؟
يا فندم نبض الشارع واضح..
باين ف شكل الغدا حضرتك..
سعادتك الطبيخ نفس..
مش لحمة وفرخة وسمك..
وسمن وزيت..
إيه يا فندم؟
ملوخية بالأرانب؟
يا ريت سعادتك يا ريت..
حمام محشي؟
سمك مشوي؟
جمبري؟
والحلو أم علي؟
حرام علي سعادتك..
إرحمني ريقي جري..
أنا خلاص..
قفلت الصفحة دي من زمان وانتهيت..
طب يا فندم عشان مراتي خايفة ع الكارت يخلص..
ورحمة أمي ما قالت حاجة..
ده أنا لوحدي اللي حسيت..




كيس بلاستيك


من كتر ما الحزن رطرط..
مبقاش خلاص يتحس..
فضلت الأحلام..
تتقص تتقص تتقص..
لحد ما بقت ف النهاية..
رغيف..
وكيس بلاستيك..
وبس.
عارف..
بصحي قلبي..
عشان يحب..
قام بقرف..
واتلفتلي..وبص.
ورجع نام تاني..




طبق اليوم


ربع كوباية مية م الحنفية..
ده لو تيسر..
نص كيلو بصل..
ومش شرط يتقشر..
وسنة ملح وفلفل أسمر..
ولو مفيش أسمر..
أي لون يعجبك..
يا عم إكتب ورايا..
إحنا من أولها هانكشر.. !
شعار البرنامج إيه..؟
الطبيخ نفس..
مش أكتر..
وتشهد علينا الحلل والبوابير..
إننا طبخنا لحم الكلاب..
والحمير..
لا حد مات..
ولا حد قال آي..
ولا حد وقع وإتكسر..
والجدع بقي اللي يعرف ليه..
أو يقدر يفسر..
معادنا الأسبوع الجاي..
مع حلقة جديدة م البرنامج..
لو كان لنا عمر..
وفينا روح..
نضحك..
ونبكي..
ونهزر..

high hopes
20-07-2008, 02:36 PM
مش بتاع كدا..


لما انا مش بتاع كدا
ولا بتاع كدا..
امال انا بقى بتاع ايه؟
لما انا مش شيخ
ولا فلتان..
لما انا مش فايق
ولا سكران..
وساعات يتهيالى
ان انا فرحان..
اتنطط واصرخ واقول هيه..
اما انا مش افندى
ولا فلاح..
ولا شجرة جميز
ولا تفاح..
ولا بتألم
ولا مرتاح..
ولا لاقى شىء استناه
ولا عندى شىء ابكى عليه..
ولما انا شايف الحال بقى كده..
طب ساكت ليه؟
يا عم انا
مش بتاع كدا
فيه ايه !!



جمهورية امبابة


قالتلى
انبوبة البوتجاز بتنفس
قولتلها..
مش الحمد لله..
لسه قادرين نتنفس..
قالتلى النور قطع..
قولتلها
ياستى نحسس..
قالتلى
الرغيف اتسخط..
قولتلها
فرصة بقى نخسس..
قالتلى
دى مركب وميت ريس..
مش هاينفع كده
قولتلها دا كدا كويس
وطى صوتك
يقولوا علينا عملاء
وخونة وبنتجسس
لصالح جمهورية امبابة..



اسكت ياض


قوللى يا عبد الجواد
مش احنا الشعب
وده مثبوت فى البطاقة
ومكتوب ف شهادة الميلاد؟
ولا مصر خلفت ولاد
غير الولاد
طب ليه..
كل ما اتكلم مع الحكومة
تقوللى اسكت ياض؟
سنين ساكنين
ف نفس الحتة الضيقة
نفس الهوا..
ونفس الدوا..
ونفس الامراض..
على فكرة
مفيش جبنة ف التلاجة
ولا خيار..
ولا انتصار..
ولا اعياد..
مفيش غير فيلم قديم ف التليفزيون
كل شوية بيتعاد..



مصاريف المدرسة


البنت بنتي..
كل يوم تكبر سنين..
حلوين عينيها..
بس ليه..
مش فرحانين
في السن ده؟
وبتقول كلام..
ليه لما تصحي..
بكون بنام..
حاولت أقرب منها..
لاقتني مش عارف أنا..
أبقي مين..
وفتحت قلبي يقولها..
ملقيتش غير..
مصاريف المدرسة..
وفلوس المدرسين..



ميكانيكى كلام


يا عم بص
هي غلطة الدكتور
غصب عنه لط العصب
ياسيدى ده الفلاح
اللى لا زرعها قمح ولا قصب
طب والباشمهندس
مش قال هانحول التراب دهب
يابا ده المحامى
باع القضية وانسحب
انت عارف مفيش ميه ليه
السباك مجاش لما الزمالك اتغلب
ياراجل حرام عليك
ده الميكروباص على المحور اتقلب
انت كده مابتشوفش قدامك
ساعة الغضب
هي غلطة ابنى الواد ميشو
مش حافظ جدول الضرب
قليل الادب




ماخدتش ولا اديت



لما وشى بقى اصفر لمونة
ماخدتش ولا اديت..
ولما اترميت ف قلب الطاحونة
ماخدتش ولا اديت..
ولما شميت ريحة شياط..
ووقعت فوق دماغى كل الحاجات..
ماخدتش ولا اديت..
ولما قالولى من ايه الدم اللى ف وشك؟
فين روحك؟
حاسب قلبك بيغشك..
ماخدتش ولا اديت..
ولما حسيت بألم ف راسى
ولقيتنى ناسى..
اسم ابنى الوحيد..
ولما شوفتك رايحة لحتة بعيد..
ماخدتش ولا اديت..
لحد مالقيتنى مربط ف جبس وشاش
وشايف كل شىء طشاش
وحواليا ناس كتير معرفهاش
بيقولولى مين اللى رماك م القطر
ياصابر..!

مواطن مصري
27-07-2008, 08:27 AM
فيديوهات من حلقته الأخيره فى العاشرة مساء:


أحسن من الأول
http://www.youtube.com/watch?v=YzBXEnlCQco


الله يرحمك يا سبت
http://www.youtube.com/watch?v=JrW_qtuEjk4


بكلمك من مصر
http://www.youtube.com/watch?v=c9WzeEo6qyE


بوابة تفتيش
http://www.youtube.com/watch?v=tsxClm1L4HI



معلش بقى اسمحلى
http://www.youtube.com/watch?v=gYirES_-el8



إنجوى :)

محمد توفيق
18-09-2008, 11:02 AM
تحية العلم


يا عم ده شهر خير..
بركة ورحمة وكرم..
رمضان كريم..
وربنا يوعدنا جميعاً..
بزيارة الحرم..
ويابخت من بات مظلوم..
ماشي يا عم..
طب واللي ظلم..
واللي باع..
واللي قبض..
واللي سلم واستلم..
يتسحر علي مركب ف النيل..
ويتصور جنب الهرم..
تعال نحسبها كده..
بالورقة والقلم..
ما هو مش معقول..
دول بس اللي بيفهموا..
والباقي بقر وغنم..
ودول بس المؤمنين..
والباقي بيعبد الصنم..
تصدق إن فيه ناس..
بتكسل تقوم تقف..
ساعة النشيد الوطني..
وتحية العلم..
وتقوللي ربنا يعديها علي خير..
طب ازاي..
ولا بلاش بقي..
اللهم إني صايم..


_________

عارفه يامه (http://www.youtube.com/watch?v=9vcQzW2qMcI)

منى الشاذلي عيطت ..!!

محمد توفيق
20-09-2008, 08:30 PM
من اروع ما قرأت لعلي سلامة

سبيل ام عباس

بقول لها ما تيجي..
نحط سيناريو للأحداث..
قالتلي يا عم..
اللي هايسري علينا..
هايسري علي الناس..
قولتلها..
يعني لو مفيش ميه..
قالتلي..
يبقي سبيل أم عباس..
قلتلها..
ولو مفيش عيش..
قالتلي..
يبقي رز وقلقاس..
قلتلها..
ولو مفيش غاز..
قالتلي..
نسيت الوابور أبوفونيه..
وطربوش وكباس..
قلتلها..
ولو مفيش نور..
قالتلي يبقي أحسن..
عشان ماتشوفش البنات..
اللي ف الدش..
يا راجل يا بصباص..
قلتلها..
ولو مفيش بيت..
قالتلي..
نبقي نقعد عند أمي
بقي وخلاص..
قولتلها ولو فيه قلق..
قالتلي كوباية شاي..
تظبط المزاج وتعدل الراس..
قلتلها ولو فيه خوف..
قالتلي..
نقفل علينا الباب..
بالقفل والترباس..
قلتلها ولو مفيش هوا..
قالتلي..
أهوي عليك بالجورنال..
وتهوي عليا بالكراس..
قلتلها..
ولو مفيش أمل..
قالتلي..
يا خرابي..
حرام عليك..
يا ساتر يارب..
ما إحنا أهو..
عايشين..
من غير قلب..
ومن غير إحساس..
عجبك كده أهو النور قطع..

المصري اليوم

20-9-2008

ايمان القوصي
04-10-2008, 08:03 AM
سنابل قمح..

مع مرور الوقت بقت بطاطا..

بقت آيس كريم شيكولاتة..

بقت طراطير..

بقت طوابير..

وبقت حاجات كتير..

بتضيع كده بمنتهي البساطة..

حرامي تقليدي..

يسرق جوزين فراخ..

ساعة ف إيدي..

يخطف سلسلة..

ينشل محفظة..

مع مرور الوقت بقي عصابة..

بقي مؤسسة..

بقي صاحب فلسفة..

بقي الأستاذ والكتاب والمدرسة..

شوية رجولة..

مع مرور الوقت بقت كفولة..

بقت بمبرز..

بقت كبسولة..

بقت حبة زرقة..

بقت مش فارقة..

بقت نوع..

حديد طري طوع..

بقت صورة..

وغيرة م اللبان دكر..

بقت ضهر البلد اللي انكسر..

بقت كده وكده..

بس ربك ستر..

وطن جميل براح..

كان بيسقي النيل..

كل يوم أفراح..

مع مرور الوقت..

بقي مرطع..

بقي مطمع..

بقي آخر انفتاح..

بقي سداح مداح..

وبقي نكتة بايخة..

من قلب مليان جراح..


سنابل قمح ..

ايمان القوصي
27-10-2008, 02:25 AM
الكيلو تسعين :

يكون في علمك

انا متواضع جدا جدا

و مش طالب كتير

لا عايز دهب

و لا عايز حرير

كفاية الستر

و شقة في الكيلو تسعين !

ما هي الحياة مشاوير

أودة و صالة

و مش مهم بقي

بتطل علي جنينة

و شجر و عصافير

و الحياة تبقي حلوة

مع بنت الحلال

و أحبها و تحبني

بذمة و ضمير

و حتة مدرسة صغيرة

أهو العيال تفك الخط

مش شرط لغات و حركات

و جغرافيا و تعبير

و صندوق انتخابات ألوميتال

عشان لا مؤاخذة الصراصير

و لا قدر الله

لو دخلت قسم بوليس

أطلع زي ما دخلت

محترم و كبير !

و ايه كمان ؟

و ايه كمان ؟؟

ااه ...

لو دة مش متوفر سعادتك

تبقي عضوية جمعية

حقوق الحيوان

و شكرا ! ..

hazem3
29-12-2010, 05:03 PM
طبعا مش هسأل ليه الموضوع وقف لأن دي روايات..

طبعا علي سلامة بيكتب دلوقتي في المصري اليوم, ودي سلامات النهاردة:

طراطيش كلام



سمعت بس طراطيش كلام

والسلام عليكم
عليكم السلام
بقيت بخاف أنام
أصحى على نفس الكابوس
أنا شفت الخطر
لكن لما سألت عن الراجل
اللى بيدق الناقوس
ناس تقول ده مات
وناس تقول محبوس
ولما جانى فى المنام
سيادة القانون
قلت له فهمنى واحدة واحدة
كده بالمحسوس
وقوللى يا مولانا
إمتى ف بلدنا
ها تتساوى الروس
لكن لما نزلت سوق الخضار
عرفت حقيقة العلاقة
بين الريس والمرؤوس
وفهمت ليه إحنا لسه واقفين
عند مرحلة
يا ترى أحسن خافض للحرارة
الحقن
ولا اللبوس
ولما اتفرجت
على مذبحة أنابيب الغاز
اتأكدت إن أهم إنجازت
لوزارة البترول
وجود تلات فرق ف الدورى
وحلم الفوز بكأس الكؤوس
وسألت عن معنى كلمة
بتوجعنى من زمان
وماخلتش ولا قاموس
سألت الدكتور مجدى
وفتحى الترزى
وحربى بتاع العرقسوس
لكن لما شفت ناس
بتفرط فى أمة بحالها
قلت الله يرحمك يامه
بقى عشان درجتين فى الكيميا
تقوليلى جتك ستين خيبة
يا ماوكوس

******************


العروسة والعريس


الفرح..
ومصر.. العروسة
وأهل المحروسة
وانا وانت.. رقصنى يا جدع
وناولنى يا ابنى العصايا..
أنا اللى عمرى ما حسيت إيه راح منى
ودايماً أعد اللى معايا
وأنا اللى معايا ـ مفيش
أنا اللى كبيرى لما انجرح
أقول بسيطة
الحمد لله إنها جت فى الريش
مين اللى قال إنى حزين
بالعكس ده أنا فى منتهى السعادة..
مبروك عليكى يا مصر
مبروك عليكى الريادة..
مبروك عليكى بقايا القمح
رغم ظروف الروس..
مبروك عليكى رمضان
من غير أدان وفانوس..
مبروك الجلوس على عرش الدراما
وينقطع إيد اللى يسحب منك السجادة
مبروك عليكى المية
والغاز
والكهربا
وربنا يكفينا شر الأحمال الزيادة
مبروك ظهور سامية
واختفاء زهرة الخشخاش
منه لله اللى بوظ الكاميرا وطفى النور
لا بقينا عارفين مين سيد ومين غادة..
مبروك عليكى عودة متعب
والتجديد لشيكابالا
واحتراف وزير الاستثمار
وارتفاع نسبة البطالة
رغم إن العمل عبادة
مبروك عليكى المجمع الانتخابى
مبروك عليكى نواب العلاج
وينكسر ضهر المحتاج
يستاهل أكتر من كده وزيادة..
مبروك عليكى الصورة
وانتخابات الشورى
ولو كان فاتك مشهد التزوير
منقول ع الهوا.. مباشرة
تقدرى تشوفى الإعادة..

سـوار الياسـمين
04-03-2012, 03:10 AM
السلام عليكم

بالفعل لا أرى وصفًا يليق بـ (علي سلامه) أكثر مما قالته العزيزه (هاي هوبس) إنه (الساخر الشاعر).

عرفت (علي سلامه) من متابعتي للدستور منذ سنوات ، يتميز شِعره بشيئ ما لا أستطيع وصفه ولكن أعرف جيدًا أنني عندما أبدأ في قراءة قصيدة لا أعرف صاحبها لا استطيع تمييز من هو صاحبها فعلاً إلا هو ، فما إن ابدأ في قراءة السطر الأول حتى ابتسم واقول فورًا (علي سلامه) ودائمًا أكون على صواب.

مميز بشكل مذهل ورائع:keda:

تحياتي

Mohamed Nasser
05-03-2012, 07:46 PM
بَوّابةْ تَفتِيشْ...


بَوّابْة تَفتيش عَلَى بَابَكْ....

كُل ما احَاولْ أعَدَّى تَزَمَّرْ...

وبْتْشَرَّطْ...

وَبتْتْأمَّرْ...

أرَجَع أدَوَّرْ تَانى وأدُوَر...

وكُل ما عَدَّي بَرْضُهْ تزمَّرْ...

طَب آدى السَّاعَةْ...

وآدى حَزَامي...

وآدى بطاقتي...

والنَضَّارَةْ...

وآدى عنواني...

وكُل حَكَايَتي...

وآدى أَمَارهْ...

حَتَّى الفكَهَّ البَاقْيةْ ف جيبي...

والأشعار...

والَمْحفَظةْ مَفيْهَاشْ غِيرْ صُوْرتَكْ...

ليلْ ونْهَارْ...

كُلْ هَدُوْمي...

زَى مَّا نَازَلْ منْ بَطْن أمي...

من غيرْ حَتَّى وَرَقةْ تُوَتْ...

وكُل مَافُوتْ...

الَبوابَّةْ بَرَضَكْ بِتزَمَرْ...

ولما لَمَحنْى...

واحد طَيبْ م الُحراَس...

وقَاللي اسْمَعني يا ابْن اَلَناسْ...

إرْمي الحتَّة الحلوةْ ف قَلَبكْ...

وعَدى...

والبَوابَة عُمْرهَا...

مَا تْزمَّرْ...